ევროკომისიამ სამწლიანი გამოძიება დაასრულა და Apple-ს ირლანდიის ბიუჯეტის სასარგებლოდ €13 მილიარდის გადახდა დააკისრა.

ევროკომისიის დასკვნის მიხედვით, ეფლისა და ირლანდიის სახელმწიფოს გარიგება, რომლის შედეგადაც ამერიკულ კომპანიას გადასახადებზე შეღავათი დაუდგინდა, არალეგალურია.

"ევროკავშირის წევრ ქვეყნებს არ აქვთ უფლება, თვითნებურად დაუდგინონ ტარიფი ამა თუ იმ კომპანიას", ნათქვამია დასკვნაში.

ირლანდიის მთავრობა ეფლს, დადგენილი 12,5 პროცენტის ნაცვლად, მხოლოდ 1%-ს ახდევინებდა.

აღნიშნულ გადაწყვეტილებას ეფლიც გამოეხმაურა, მათი თქმით, ევროკომისიის გადაწყვეტილება საზიანო იქნება კომპანიისთვის და ნეგატიური ეფექტი ექნება ევროპაში განსახორციელებელ ინვესტიციებსა და უკვე არსებულ ან მომავალ სამუშაო ადგილებზე.

Apple-ის პოზიციას იზიარებს ირლანდიის ფინანსთა მინისტრიც, რომელიც ამბობს, რომ იძულებული იქნება გაასაჩივროს გადაწყვეტილება და დაიცვას ქვეყნის საგადასახადო სისტემის მთლიანობა და სუვერენიტეტი.