საქართველოს პარლამენტის იურიდიულ საკითხთა კომიტეტის უკვე ყოფილი თავმჯდომარე, ეკა ბესელია აცხადებს, რომ იუსტიციის უმაღლესმა საბჭოს უზენაესი სასამართლოს მოსამართლეობის კანდიდატების სია უკან უნდა გაითხოვონ. მისი განმარტებით, სწორედ სიის შემადგენლობასთან დაკავშირებული კითხვების გამო დატოვა თავმჯდომარის თანამდებობა.

ეკა ბესელია ფიქრობს, რომ მოსამართლეობის კანდიდატების შესასწავლად სამუშაო ჯგუფი უნდა შეიქმნას და კომიტეტმა და პარლამენტმა პროცედურების სრული დაცვით უნდა იმოქმედოს.

"სია უნდა იყოს გაწვეული და არა შეჩერებული. უნდა იყოს ყველა პროცედურა გაწერილი", — განაცხადა ეკა ბესელიამ საგანგებო ბრიფინგზე.

მისივე თქმით, სიაში არიან ადამიანები, რომლებიც არამხოლოდ მისი შვილისა და ძმის პოლიტიკური საქმის მოსამართლეები იყვნენ, არამედ პოლიტიკურად მოტივირებულ საქმეებსაც განიხილავდნენ.

"მიმაჩნია, მიმაჩნდა და ყოველთვის ეს განწყობა მექნება, რომ უზენაეს სასამართლოს უნდა ყავდეს ის მოსამართლეები ის მაღალი კვალიფიკაციის და ისეთი რეპუტაციის მქონე იურისტები, რომლებიც არ ემსახურებოდნენ სააკაშვილის ძალადობრივ რეჟიმს", — განაცხადა ეკა ბესელიამ.

On.ge-ს იუსტიციის უმაღლეს საბჭოში განუცხადეს, რომ საბჭოს მოსამართლე წევრებმა თავისი პოზიცია უკვე დააფიქსირეს ეკა ბესელიას გადადგომამდე. უცნობია, შეიცვლის თუ არა აზრს იუსტიციის უმაღლესი საბჭო.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი უკვე დაასახელა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

იუსტიციის უმაღლესი საბჭოს მოსამართლეები აცხადებენ, რომ კანდიდატებად ღირსეული და კომპეტენტური პირები შეარჩიეს. საქართველოს პარლამენტის თავმჯდომარის, ირაკლი კობახიძის განცხადებით, საქართველოს პარლამენტმა მიიღო გადაწყვეტილება და კანდიდატების სიას საგაზაფხულო სესიაზე განიხილავს.

გაიგე მეტი: