"გადმოდი ქალების მხარეს" — ამ ლოზუნგით საქართველოს პირველი ქალი პრეზიდენტის რეზიდენციასთან პირველი აქცია ქალმა აქტივისტებმა გამართეს. ისინი პრეზიდენტის საპარლამენტო მდივნის პოსტზე, დიმიტრი გაბუნიას დანიშვნას აპროტესტებენ.

აქციის მონაწილეებმა ათონელის რეზიდენციასთან წითელი ლენტი დაამაგრეს წარწერით: "გადმოდი ქალების მხარეს".

აქციის ერთ-ერთი ორგანიზატორი, იდა ბახტურიძე On.ge-სთან საუბარში აცხადებს, რომ დიმიტრი გაბუნია არის ადამიანი, რომელმაც სექსუალური შევიწროების მიმართ დააფიქსირა პოზიცია და ამის ნორმალიზება მოახდინა. მათი მოთხოვნაა სალომე ზურაბიშვილმა მოხსნას დიმიტრი გაბუნია საპარლამენტი მდივნის თანამდებობიდან. იდა ბახუტირიძის თქმით, მათი მეორე მოთხოვნაა, შეხვდეს ქალებს სალომე ზურაბიშვილი და მოისმინოს მათი აზრი.

ფოტო: სალომე ჩადუნელი / On.ge

ფოტო: სალომე ჩადუნელი / On.ge

ფოტო: სალომე ჩადუნელი / On.ge

ფოტო: სალომე ჩადუნელი / On.ge

ქალთა მძრაობის ბრალდებებს დიმიტრი გაბუნია 2 დღის წინ, 20 დეკემბერს გამოეხმაურა. პრეზიდენტის საპარლამენტო მდივნის განცხადებით, ქალთა მოძრაობა მისი მისამართით ცრუ ბრალდებებს ავრცელებს. ის ამბობს, რომ ადვოკატის კლიენტთან გაიგივება არ შეიძლება და "ამ თემაზე ინსინუაციები უნდა დასრულდეს".

დიმიტრი გაბუნია ზვიად დევდარიანის ადვოკატი იყო, რომელიც ქალთა მოძრაობამ სექსუალურ შევიწროებაში დაადანაშაულა. მოგვიანებით, დევდარიანის მხრიდან სექსუალური შევიწროების შემთხვევები დაადგინა სახალხო დამცველმაც.

საქართველოს მეხუთე პრეზიდენტმა, სალომე ზურაბიშვილმა პირველ სამუშაო დღეს ადმინისტრაციის ხელმძღვანელი და საპარლამენტო მდივანი წარადგინა.