პარტია თავისუფალი საქართველოს ლიდერმა, გოგი წულაიამ პრესკონფერენციაზე ქუთაისის 2019 წლის ბიუჯეტის პროექტი დაწვა. წულაიას თქმით, ბიუჯეტი მოსალეობის საჭიროებებს არ ერგება და არც ქალაქის განვითარებას ითვალსწინებს.

"ეს ბიუჯეტი ჩათვალეთ, რომ არის დამწვარი ქალაქისთვის და არავითარი სიკეთე და არავითარი რამის მომტანი არ არის", — განაცხადა დეპუტატმა და ბიუჯეტის პროექტი დემონსტრაციულად დაწვა.

ეს არ არის პირველი შემთხვევა, როცა გოგი წულაია პროტესტის გამოსახატად განსხვავებულ ფორმას არჩევს. რამდენიმე თვის წინ მან ფოთის, წყალტუბოსა და ხაშურის საკრებულოებს ფოსტით მახათები გაუგზავნა. როგორც წულაიამ On.ge-ს უთხრა, მახათების გაგზავნას ცნობილი ქართული ანდაზა უდევს საფუძვლად.

წულაიამ ყოფილ საპრეზიდენტო კანდიდატ კახა კუკავასთან ერთად ბიძინა ივანიშვილის სახელობის ტექნოლოგიური უნივერსიტეტიც გახსნა. 2016 წლის საპარლამენტო არჩევნების საარჩევნო მმართველი გუნდის პროგრამაში აღნიშნული იყო, რომ ქუთაისში ტექნოლოგიური უნივერსიტეტი აშენდებოდა. სწორედ ეს გააპროტესტა წულაიამ.