საქართველოს პრეზიდენტმა გიორგი მარგველაშვილმა საპრეზიდენტო უფლებამოსილების განხორციელების 5-წლიან პერიოდში სახელმწიფო ჯილდოებით სულ 767 ადამიანის ღვაწლი აღნიშნა.

საქართველოს პრეზიდენტმა ეროვნული გმირის წოდება სიკვდილის შემდეგ მიენიჭა: წითელი ჯვრის მოწყალების დას მარო მაყაშვილს, საქართველოს უშიშროების პოლკოვნიკს მამია ალასანიასა და სოხუმის მერს, პოლკოვნიკ გურამ გაბესკირიას სამშობლოს დამოუკიდებლობის დაცვისა და ერთიანობისათვის ბრძოლაში გამოჩენილი გმირობისა და ქვეყნის წინაშე აღმატებული ღვაწლისათვის.

პრეზიდენტის ადმინისტრაციის ინფორმაციით, გიორგი მარგველაშვილმა ერთადერთხელ გამოიყენა თამარ მეფის ორდენით დაჯილდოების უფლებამოსილება და აღნიშნული სახელმწიფო ჯილდო ქვეყნისა და ერის წინაშე განსაკუთრებული ღვაწლისათვის, გამორჩეული საზოგადოებრივი მოღვაწეობისა და სამოქალაქო თავდადებისათვის ირინა ენუქიძეს (სიკვდილის შემდეგ) მიანიჭა.

ოქროს საწმისის ორდენი გადაეცა 24 უცხოელს, რომლებმაც განსაკუთრებული წვლილი შეიტანეს ქართული სახელმწიფოს აღმშენებლობაში. მათ შორის არიან: აშშ-ს თავდაცვის სახელმწიფო მდივნის თანაშემწე ენდრიუ ვებერი, ევროპარლამენტის წევრი იოჰანნეს კორნელის ვან ბალენი, ნატო-ს გენერალური მდივნის მოადგილე ალექსანდრ ვერშბოუ, საფრანგეთის თავდაცვის მინისტრი ჟან ივ ლე დრიანი, საქართველოს საპატიო კონსული პარაგვაის რესპუბლიკაში კონრადო პაპალარდო სალდივარი, ჩინეთის სახალხო რესპუბლიკის საგანგებო და სრულუფლებიანი ელჩი საქართველოში იუე ბინი, აშშ-ის შეიარაღებული ძალების ევროპის სარდლობის მეთაური, ევროპაში ნატო-ს შეიარაღებული ძალების უმაღლესი სარდალი ფილიპ მარკ ბრიდლავი, ქალაქ ლევილ სურ ორჟის მერის მრჩეველი დანიელ ესპრენი და სხვა.

ამასთან, გიორგი მარგველაშვილმა დააჯილდოვა:

  • წმინდა გიორგი სახელობის გამარჯვების ორდენით 26 ადამიანი;
  • ბრწყინვალების საპრეზიდენტო ორდენით 52 ადამიანი;
  • წმინდა ნიკოლოზის ორდენით 4 ადამიანი;
  • ვახტანგ გორგასლის I ხარისხის ორდენით 78 ადამიანი;
  • ვახტანგ გორგასლის II ხარისხის ორდენით 107 ადამიანი;
  • ვახტანგ გორგასლის III ხარისხის ორდენით 95 ადამიანი;
  • ღირსების ორდენით 225 ადამიანი;
  • მედლით "სამოქალაქო თავდადებისათვის" 10 ადამიანი;
  • მედლით "მხედრული მამაცობისათვის" 46 ადამიანი;
  • მედლით "საბრძოლო დამსახურებისათვის" 19 ადამიანი;
  • ღირსების მედლით 76 ადამიანი.