შინაგან საქმეთა სამინისტროს ინფორმაციით, ფონიჭაალში განსაკუთრებით დიდი ოდენობით ნარკოტიკული ნივთიერება ამოიღეს. უწყებაში ამბობენ, რომ სამართალდამცველებმა ბრალდებულის პირადი ჩხრეკისას ერთი, ხოლო მისი კუთვნილი ავტომანქანის ჩხრეკისას 42 შეკვრად დაფასოებული ნარკოტიკული საშუალება ჰეროინი ამოიღეს.

გამოძიება ნარკოტიკული საშუალების უკანონოდ შეძენა-შენახვის საქმეზე საქართველოს სისხლის სამართლის კოდექსის 260-ე მუხლით მიმდინარეობს. დანაშაული 8-დან 20 წლამდე ან უვადო თავისუფლების აღკვეთას ითვალისწინებს.

შინაგან საქმეთა სამინისტროში ამბობენ, რომ მიმდინარე წლის განმავლობაში განსაკუთრებით დიდი ოდენობით სხვადასხვა ნარკოტიკული საშუალება ამოიღეს და 116 ნარკორეალიზატორი დააკავეს. მათი თქმით, ამ დრომდე ამოღებულია: 35 კილოგრამი ჰეროინი, 6 კილო და 600 გრამი კოკაინი, 12 ათასამდე აბი სუბოტექსი და სუბოქსინი, 3 კილოგრამამდე MDMA, ასევე, 1 კილო და 500 გრამი სხვადასხვა სახის ფსიქოტროპული მედიკამენტები.