თეთრი ხმაურის მოძრაობა განცხადებას ავრცელებს, რომელშიც აღნიშნულია, რომ ვრცელდება ინფორმაცია მოქალაქეების ინტოქსიკაციის შესახებ, რომელიც შესაძლოა, სინთეზური ოპიოიდით, ფენტანილით იყოს გამოწვეული.

მოძრაობა განმარტავს, რომ მოქალაქეებმა ის შეიძინეს, როგორც ნარკოტიკული საშუალება MDMA, რომლის მიღების შედეგად გამოუვლინდათ სიმპტომები: ძილიანობა, არეული ცნობიერება, ჰალუცინაციები, ეიფორია, კუნთების რიგიდულობა და კომატოზური მდგომარეობა.

"გავრცელებული ინფორმაციით, ქვეყანაში შექმნილია ნალოქსონის დეფიციტი, რომელიც ოპიოიდური ზედოზირების დროს ადამიანის სიკვდილისგან ხსნის ერთადერთი საშუალებაა", — წერს მოძრაობა. ისინი მოუწოდებენ ყველა ადამიანს, ვინც მოიხმარს ნარკოტიკულ საშუალებებს, შეწყვიტონ და ნებისმიერ ფასად თავი შეიკავონ ნებისმიერი სუბსტანციის მიღებისგან.

ამასთან დაკავშირებით On.ge დაუკავშირდა შინაგან საქმეთა სამინისტროს, სადაც განაცხადეს, რომ ინფორმაციას ამოწმებდნენ.

მიმდინარე წლის აპრილსა და მაისში უცნობი ნარკოტიკული საშუალებით 5 ადამიანი გარდაიცვალა, ხოლო 10-ზე მეტმა მძიმე ინტოქსიკაცია მიიღო. თეთრი ხმაურის მოძრაობა და ნარკოლოგების ნაწილი ფიქრობდა, რომ ეს ნივთიერება ფენტანილი იყო.

მოძრაობა პასუხისმგებლობას სახელმწიფოს აკისრებდა, რადგან "ვითარების ცვლილებისთვის ის არაფერს აკეთებდა".

ამავე თემაზე: