სოფელ ატოცში ოკუპანტებმა უკანონო ბორდერიზაციის პროცესი განაახლეს. სახელმწიფო უსაფრთხოების სამსახურის ცნობით, ამ მომენტისთვის ეს უკანონო პროცესი არ მიმდინარეობს. სუს-ის ცნობით, "საოკუპაციო ხაზის გასწვრივ ნებისმიერი ტიპის ხელოვნური ბარიერის აღმართვა წარმოადგენს უკანონობას და ხელყოფს უსაფრთხოების გარემოს".

უკანონო ბორდერიზაციის პროცესის პარალელურად სოფელ ატოცში პატრულირებდა ანტისაოკუპაციო მოძრაობა ძალა ერთობაშია. ამ მოძრაობის წევრების თქმით, ბორდერიზაციის პროცესი უამინდობის გამო შეწყდა და ხვალ, 6 დეკემბერს განახლდება.

მოძრაობის წარმომადგენლები ამბობენ, ისინი ხვალ მთელი დღის განმავლობაში ადგილზე იქნებიან და არ მისცემენ ოკუპანტებს იმის საშუალებას, რომ განახორციელონ ბორდერიზაციის სამუშაოები.

ანტისაოკუპაციო მოძრაობის, ძალა ერთობაშიას წევრის, ლაშა ბერულავას ინფორმაციით, ერგნეთში სამუშაო შეხვედრაა დაგეგმილი, სადაც დეფაქტო ხელისუფლების წარმომადგენლები ანტისაოკუპაციო მოძრაობის აქტივისტების ტერიტორიიდან გაყვანის საკითხის დაყენებას გეგმავენ.

"ისინი დგანან ფაქტის წინაშე, რომ ჩვენი აქ ყოფნა, ჩვენი პატრულირება ხელს უშლის ოკუპანტთა მისიას — განაახლონ ბორდერიზაცია", — განაცხადა ლაშა ბერულავამ.

6 ნოემბერს ცნობილი გახდა, რომ ქარელის მუნიციპალიტეტის სოფელ ატოცის მიმდებარე ტერიტორიაზე მავთულხლართების უკანონო გაბმა მიმდინარეობს. სახელმწიფო უსაფრთხოების სამსახურის განცხადებით, აღნიშნულ ფაქტთან დაკავშირებით გააქტიურებულია ცხელი ხაზი და ინფორმირებულია ევროკავშირის სადამკვირვებლო მისია.

სოფელ ატოცში საოკუპაციო ხაზის გავლება 2008 წლის აგვისტოს ომის შემდეგ დაიწყო. 2014 წელს ე.წ საზღვრის გავლების შედეგად ადგილობრივებმა 30 ჰექტარი მიწა დაკარგეს.