6-დან 11 დეკემბრის ჩათვლით, ილიას სახელმწიფო უნივერსიტეტში ადამიანის უფლებათა საუნივერსიტეტო კვირეული გაიმართება.

კვირეული ყოველწლიურად დეკემბერში ეწყობა. მისი მიზანია სტუდენტებსა და ახალგაზრდებში ადამიანის უფლებების პრობლემური საკითხების შესახებ ცოდნის გავრცელება და უნივერსიტეტების თანამშრომლობის გზით ადამიანის უფლებების სამართლის შესახებ იდეათა და მოსაზრებათა აქტიური გაცვლა.

ილიას სახელმწიფო უნივერსიტეტი კვირეულის ფარგლებში არაერთ ღონისძიებას გამართავს.

ღონისძიებების განრიგი:

  • დოკუმენტური ფილმის "მე გადავცურე ენგური" კინოჩვენება და დისკუსია

6 დეკემბერს ილიაუნის სულხან-საბა ორბელიანის სამკითხველო დარბაზის სამუშაო სივრცეში დოკუმენტური ფილმის "მე გადავცურე ენგურის" კინოჩვენება და დისკუსია გაიმართება.

"მე გადავცურე ენგური" ახალგაზრდა ქართველი რეჟისორის, ანუნა ბუკიას დოკუმენტური ფილმია. ამბავი იმაზე, თუ როგორ აქრობს სახლისა და სიმშვიდის შეგრძნებას ადამიანებისთვის დაღად ქცეული ოკუპაცია.

ფილმში მოთხრობილია ნამდვილი ისტორიები იმ ბარიერებზე, რომელთა გადალახვაც ადამიანებს სახლში, აფხაზეთში, დასაბრუნებლად უწევთ. ზოგი ბარიერი ბუნებრივია, მაგალითად, მდინარე ენგური, ზოგიც – ხელოვნური, მაგალითად, რუსი სამხედროების მიერ შექმნილი მავთულხლართები საოკუპაციო ხაზის გასწვრივ.

ფილმში მთხრობელი თავად რეჟისორია, რომელმაც 4 წლისამ ომში დაკარგა სახლი და ახლა ფარულად ცდილობს მის მოძებნას.

ვრცელი ინფორმაცია ღონისძიების შესახებ ხელმისაწვდომია ამ ბმულზე.

  • საჯარო ლექცია: "ადამიანის უფლებათა გაკვეთილი – ბოლოს და ბოლოს, სად იწყება ადამიანის უნივერსალური უფლებები?"

10 დეკემბერს ილიაუნის წიგნის სახლში "ლიგამუსი" საჯარო ლექცია "ადამიანის უფლებათა გაკვეთილი – ბოლოს და ბოლოს, სად იწყება ადამიანის უნივერსალური უფლებები?" და დისკუსია გაიმართება.

"ადამიანის უფლებათა გაკვეთილი – ბოლოს და ბოლოს, სად იწყება ადამიანის უნივერსალური უფლებები?" ადამიანის უფლებების სამართლის საუნივერსიტეტო კვირეულის ფარგლებში სპეციალურად სკოლის მოსწავლეებისთვის დაგეგმილი ღონისძიებაა, რომლის მიზანიც მათთვის ადამიანის ძირითადი უფლებების გაცნობაა.

ღონისძიებაზე მოსწავლეები შეძლებენ სამართლის სკოლის სტუდენტებთან ერთად განიხილონ ადამიანის სიცოცხლის, თავისუფალი გადაადგილების, სიტყვის თავისუფლების, განათლებისა და სხვა ძირითადი უფლებები, ისაუბრონ მათი დაცვის მნიშვნელობასა და დაცვის საშუალებებზე, დასვან მათთვის საინტერესო შეკითხვები და ჩაერთონ დისკუსიაში.

ღონისძიებაზე დასწრებას მოსწავლეების გარდა შეძლებენ დაინტერესებული სტუდენტებიც.

ვრცელი ინფორმაცია ღონისძიების შესახებ ხელმისაწვდომია ამ ბმულზე.

  • ილიას სახელმწიფო უნივერსიტეტი ადამიანის უფლებებისა და საკონსტიტუციო სამართლის კლინიკის გახსნა.

11 დეკემბერს ილიაუნის უნივერსიტეტში ადამიანის უფლებებისა და საკონსტიტუციო სამართლის კლინიკის გახსნა გაიმართება.

ილიას სახელმწიფო უნივერსიტეტის ადამიანის უფლებებისა და საკონსტიტუციო სამართლის კლინიკა ილიას სახელმწიფო უნივერსიტეტისა და აღმოსავლეთ-დასავლეთის მართვის ინსტიტუტის კანონის უზენაესობის მხარდაჭერა საქართველოში (USAID/PROLoG) პროგრამის თანამშრომლობის ფარგლებში შეიქმნა.

კლინიკის მისიაა სამართლებრივი ცოდნის შექმნა, გადაცემა, გამოყენება, სტუდენტებისთვის საკონსტიტუციო სამართლისა და ადამიანის უფლებების სფეროში სწავლების თეორიული, პრაქტიკული და საადვოკატო უნარ-ჩვევების გამომუშავება, იურიდიული აზროვნების განვითარება და ღირებულებების ჩამოყალიბება.

კლინიკა ორი მიმართულებით მუშაობს, ესენია: ადამიანის უფლებები და საკონსტიტუციო სამართალი. მისი მიზანია, გააღრმაოს სტუდენტებში ადამიანის უფლებების, როგორც უზენაესი ღირებულებების, პატივისცემა და ხელი შეუწყოს საკოსტიტუციო სამართლისა და ადამიანის უფლებების სფეროში სამართალწარმოების განვითარებას.

ვრცელი ინფორმაცია ღონისძიების შესახებ ხელმისაწვდომია ამ ბმულზე.