გუშინ, 30 ნოემბერსს საქართველოში შემოსვლაზე უარი უთხრეს კლუბის მტკვარზე სტუმარს Ahu-ს, რომელიც კლუბში დაგეგმილი Deep House Tehran Showcase ჰედლაინერი უნდა ყოფილიყო.

On.ge-ს შინაგან საქმეთა სამინისტროში ფაქტი დაუდასტურეს. საზღვრიდან უკან გაბრუნების მიზეზად უწყებაში უცხოელთა და მოქალაქეობის არმქონე პირთა სამართლებრივი მდგომარეობის შესახებ საქართველოს კანონის მე-11 მუხლის 1 პუნქტის "დ" და "თ" ქვეპუნქტები დაასახელეს.

ეს ნიშნავს, რომ საქართველოში შემოსვლის სურვილის მქონე Ahu-ს უარს უთხრეს, რადგან მას არ ჰქონდა ჯანმრთელობისა და უბედური შემთხვევის დაზღვევა ან საქართველოში ცხოვრებისათვის და უკან დასაბრუნებლად საკმარისი ფინანსური სახსრები; ხოლო, ამ კანონის თ ქვეპუნქტით, Ahu-ს საზღვრიდან გააბრუნეს, რადგან იგი არ იძლეოდა ინფორმაციას ან იძლეოდა ყალბ ინფორმაციას თავისი პიროვნებისა და მგზავრობის მიზნის შესახებ.

კლუბ მტკვარზეს წარმომადგენლებმა ფეისბუქზე დაწერეს, რომ Ahu არის არტისტი თეირანიდან, რომელიც ლეიბლ Shahr Farang-ით უდიდეს გავლენას ახდენს ირანის კულტურულ ცხოვრებაზე.

"ჩვენი სამი სტუმრიდან Ahu ერთადერთია, რომელმაც შეძლო დაეტოვებინა ირანი და ამჟამად ბერლინში ცხოვრობს. მისი მოღვაწეობის, კულტურული გავლენისა და ემიგრაციის შემდეგ ჩვენც და არტისტსაც გვაქვს საფუძვლიანი ეჭვი, რომ ირანის მთავრობისთვის ის სასურველი პერსონა არ არის. სამწუხაროდ, ამ მიზეზით თანამედროვე აღმოსავლეთის ერთ-ერთი განსაკუთრებული არტისტი არასასურველი პერსონა აღმოჩნდა საქართველოსთვისაც", — აცხადებენ კლუბი მტკვარზე-ს წარმომადგენლები.

მათი პოზიციით, იმის ფონზე, როცა თბილისში ღამის ეკონომიკის ფორუმი მიმდინარეობს, ასეთი უყურადღებო ქმედება სახელმწიფოს და ქალაქის ადმინისტრაციისგან ადასტურებს, რომ ისინი საკლუბო სცენას ხედავენ მხოლოდ როგორც ეკონომიკას და არცერთ შემთხვევაში, როგორც კულტურულ სივრცეს.

Deep House Tehran Showcase მტკვარზე მაინც ჩატარდება. Nesa Azadikhan და Payam Parvizi თქვენთვის მთელი ღამის განმავლობაში დაუკრავენ.