ფრაქცია ქართული ოცნების თავმჯდომარე, მამუკა მდინარაძე აცხადებს, რომ არის შანსი, რომ ნაციონალურ მოძრაობაზე 300 000 ხმით გაიმარჯვონ.

მდინარაძის თქმით, ნაციონალურმა მოძრაობამ ეს მონაცემები იცის და დაიწყო ამომრჩევლების მობილიზება იმ საარჩევნო უბნებზე, სადაც კომპანია ედისონ რისერჩი ეგზიტპოლებს ატარებს.

"თუ ასეთი ტემპით გაგრძელდა საარჩევნო პროცესი, ჩვენ გვაქვს შანსი, რომ ნაციონალურ მოძრაობაზე გავიმარჯვოთ დაახლოებით 300 ათასი ხმით. ამ შემთხვევაში ამ მოძრაობას, ამ ძალას, რომელსაც სწყურია რევანში, მივმართავ, რომ აზრი ეკარგება ყოველგვარ მანიპულაციებს, პროვოკაციებს და ა.შ. მათ შორის კვლევებით და ეგზიტპოლით მანიპულაციას. ნაციონალური მოძრაობა ამ წუთებში ახდენს საკუთარი აქტივის მობილიზებას იმ ადგილებში, სადაც ედისონ რისერჩი ატარებს გამოკითხვებს", — განაცხადა მამუკა მდინარაძემ.

საპრეზიდენტო არჩევნებში ეგზიტპოლის შედეგებს რუსთავი 2 და ტელეკომპანია იმედი გამოაცხადებს.