ქართული ოცნების შტაბში პარლამენტის თავმჯდომარის პირველმა მოადგილემ, თამარ ჩუგოშვილმა არჩევნების დღეს პირველი ბრიფინგი გამართა. მისი განცხადებით, ხელისუფლება გარანტია, რომ საპრეზიდენტო არჩევნების მეორე ტური ჩატარდება თავისუფალ, გამჭვირვალე და დემოკრატიულ გარემოში.

"მივმართავთ ჩვენს მოქალაქეებს, მნიშვნელოვანია, რომ გამოვიჩინოთ მაღალი მოქალაქეობრივი პასუხისმგებლობა, მონაწილეობა მივიღოთ საარჩევნო პროცესში და დავაფიქსიროთ ამ ძალიან მნიშვნელოვან არჩევნებში ჩვენი პოზიცია.. მოვუწოდებთ ასევე ყველა პოლიტიკურ სუბიექტს, მაღალი პასუხისმგებლობით მოეკიდონ არჩევნებს, არ დაუშვან საარჩევნო კანონმდებლობის დარღვევა და პროვოკაციები", — განაცხადა თამარ ჩუგოშვილმა.

მისი თქმით, ყველა დარღვევაზე იქნება კანონიერი რეაგირება სახელმწიფოს მხრიდან.

"უკვე ჩანს, რომ არის მცდელობები გარკვეულ ადგილებზე, რომ ასეთი პროვოკაციები იქნას ინიცირებული, ამიტომ ძალიან მნიშვნელოვანია, პოლიტიკური პარტიები პასუხისმგებლობით მოეკიდონ საარჩევნო პროცესს. ასევე მივმართავთ დამკვირვებლებს, რომ სათანადოდ ასახონ ის დარღვევები და ფაქტები, რასაც ადგილი ექნება და თუ ექნება დაკვირვების პროცესში", — განაცხადა ჩუგოშვილმა.

მმართველმა გუნდმა მოუწოდა ამომრჩეველს იმოქმედოს კანონის სრული დაცვით და არ აჰყვეს პროვოკაციებს.

"ძალიან მნიშვნელოვანი არჩევნებია, ემოციურად აქტიურად არის ყველა ამ პროცესში ჩართული", — განაცხადა ჩუგოშვილი.

ქართული ოცნების ოფისში არჩევნების დღის განმავლობაში პარტიის ლიდერები რამდენიმე ბრიფინგს ჩაატარებენ.

დღეს, 28 ნოემბერს საქართველოში საპრეზიდენტო არჩევნების მეორე ტური იმართება. საქართველოს მასშტაბით დილის რვა საათზე საარჩევნო უბნები გაიხსნა და ხმის მიცემის პროცესი დაიწყო.

მეორე ტურში მონაწილეობას გაერთიანებული ოპოზიციის კანდიდატი გრიგოლ ვაშაძე და მმართველი პარტიის მხარდაჭერილი კანდიდატი სალომე ზურაბიშვილი იღებენ.