საპრეზიდენტო არჩევნების მეორე ტურისთვის წინა არჩევნების მსგავსად კოორდინატორები არიან საარჩევნო უბნებთან მობილიზებული. ფოტოსა და ვიდეოს გადაღების დროს მათი ნაწილი აგრესიით გამოირჩეოდა.

სამგორის მე-14 და მე-15 უბნებთან შეკრებილი კოორდინატორები On.ge-ს ჟურნალისტებს ეუბნებოდნენ, რომ ხელში "ქმრის დაბადების მოწმობა" ეჭირათ, ზოგი კი აღნიშნავდა, რომ "ოჯახობას" ელოდებოდა.

ვიდეოს გათიშვის შემდეგ ადვოკატთა და იურისტთა საერთაშორისო ობსერვატორიის სახელით რეგისტრირებული ეკატერინე ნაპირელი კოორდინატორებთან მივიდა და უთხრა, რომ უკანონოს არაფერს აკეთებდნენ, რადგან ცესკოს სიების ქონა კანონდარღვევა არ იყო.