მომღერალმა სოფო ხალვაშმა On.ge-სთან საუბარში დაადასტურა, რომ ბათუმის მერის მაოდგილედ დაინიშნა. ხალვაში ამბობს, რომ შეთავაზება უშუალოდ მერისგან, ლაშა კომახიძისგან მიიღო.

"მისგან [ლაშა კომახიძისგან] არაერთხელ მიმიღია შეთავაზება აქამდე, მაგრამ ახლა გადავდგი ეს ნაბიჯი", — ამბობს მომღერალი.

სოფო ხალვაში აღნიშნავს, რომ აქამდე ფიქრობდა შეთავაზებაზე, ვინაიდან არ სურდა სიმღერას ჩამოშორებოდა:

"დამარწმუნეს რომ ამაში [სიმღერაში] ხელი არ შეგეშლება და აქედან გამომდინარე მივიღე ეს გადაწყვეტილება".

მომღერალ სოფო ხალვაშის ბათუმის მერის, ლაშა კომახიძის მეორე მოადგილედ დაინიშვნაზე ინფორმაცია დღეს, 27 ნოემბერს გავრცელდა. ბათუმის მერიაში განაცხადეს, რომ ამის შესახებ 12 საათამდე ინფორმაციას არ ავრცელებენ.

სოფო ხალვაში აჭარის საზოგადოებრივი მაუწყებლის გადაცემის, დილის ტალღის წამყვანი იყო. ის ტელეეთერიდან დროებით მას შემდეგ მოხსნეს, რაც პრეზიდენტობის კანდიდატის სალომე ზურაბიშვილის საარჩევნო კამპანიაში ჩაერთო.

ხალვაშმა მმართველი პარტიის, ქართული ოცნების მიერ მხარდაჭერილი პრეზიდენტობის კანდიდატის, სალომე ზურაბიშვილის შემაჯამებელ წინაარჩევნო შეხვედრაზე იმღერა. მომღერალი სოფო ხალვაში თბილისში სპორტის სასახლეში გამართულ შეხვედრას დაესწრო. სოფო ხალვაშმა ბათუმსა და თბილისში გამართულ, სალომე ზურაბიშვილის მხარდამჭერ კონცერტებზე იმღერა და კლიპშიც მიიღო მონაწილეობა.