სახელმწიფო დაცვის სპეციალური სამსახური აგიტაციის შესახებ ბრალდებებს ეხმაურება და აცხადებს, რომ მათი უწყება აპოლიტიკურია.

"სრული პასუხისმგებლობით ვაცხადებთ, ეს არის სრული დეზინფორმაცია, რომელიც საზოგადოების შეცდომაში შეყვანას ისახავს მიზნად", — ნათქვამია უწყების განცხადებაში.

ისინი გამორიცხავენ დაცვის სამსახურის თანამშრომლების რაიმე ფორმით მონაწილეობას საარჩევნო კამპანიაში რომელიმე კანდიდატის სასარგებლოდ. მათივე თქმით, არავითარი სია არ არსებობს გარდა იმ სიებისა, რომელიც დგება იმისთვის, რათა თანამშრომლებმა, რომლებიც არჩევნების დღეს სამსახურებრივ მოვალეობას ასრულებენ, შეძლონ არჩევნებში მონაწილეობა.

26 ნოემბერს ტელეკომპანია რუსთავი 2-მა გაავრცელა ინფორმაცია, რომ სახელმწიფო დაცვის სპეციალური სამსახურის თანამშრომლები წინასაარჩევნოდ სალომე ზურაბიშვილის სასარგებლოდ რეგიონებში აგიტაციას ეწევიან. კურიერის ცნობით, სახელმწიფო დაცვის სპეციალური სამსახურის ხელმძღვანელმა, ანზორ ჩუბინიძემ რეგიონებში სულ 36 კაცი მიავლინა და ისინი აგიტაციის დროს შანტაჟსაც მიმართავენ.