გლდანში მდებარე სტამბის, შპს კარტოგრაფიის დირექტორი ვლადიმერ ბუაჩიძე ზედმეტი ბიულეტინების ბეჭდვასთან დაკავშირებით განმარტავს, რომ გავრცელებული ინფორმაცია "სიცრუეა" და აღმოჩენილი ბიულეტინები წუნდებულია. მისივე მტკიცებით, აღნიშნული ბილეტინები მოგვიანებით განადგურდება. სტამბის დირექტორის კომენტარს ცენტრალური საარჩევნო კომისიის პრესსამსახური ავრცელებს.

იგივეს ამტკიცებს ცესკოს საფინანსო დეპარტამენტის უფროსი ოთარ ბუსკივაძე:

"ჩვენ დავბეჭდეთ ბიულეტინები 7 საარჩევნო ოლქისთვის. იქ არის სხვადასხვა ბეჭდვითი პროცესები, რაც იწვევს ნარჩენებს, რომლებიც ცესკოს წარმომადგენლების თანდასწრებით ნადგურდება".

მისი თქმით, ცესკოში არაუფლებამოსილი პირი შევიდა. როგორც კომისიაში On.ge-ს განუმარტეს, საუბარია ზვიად კუპრავაზე, რომელიც დღეს, 25 ნოემბერს აღნიშნულ სტამბაში მონიტორინგისთვის მივიდა და გაყალბების შესაძლო რისკებზე ისაუბრა.

სამართალდამცველთა რეფორმირების ცენტრის ხელმძღვანელი, ზვიად კუპრავა რუსთავი 2-თან საუბრისას ამბობს, რომ ე.წ. ხარვეზიან ბიულეტენებს წუნი არ ეტყობა და თავისუფლად შეიძლება მათი არჩევნებზე გამოყენება.

"ერთი შეხედვით, ბიულეტენს არავითარი ხარვეზი არ ეტყობა, მასზე არის აღნიშნული ორივე საარჩევნო სუბიექტი, მასზე არის მითითებული ბიულეტენის ნომერი და ა.შ. ყველა ის რეკვიზიტი, რაც სჭირდება ბიულეტენს, შესაბამისად, ბიულეტენი არის ჩვეულებრივი ბიულეტენი, რომლის გამოყენებაც არჩევნების დღეს შეიძლება", — აცხადებს კუპრავა.

დღეს, არჩევნებამდე სამი დღით ადრე ფეისბუქზე გავრცელდა ფოტო, სადაც ჩანს რომ საპრეზიდენტო არჩევნების მეორე ტურისთვის დაბეჭდილი ბიულეტინი დაზიანებულია:

ბიულეტინების ბეჭდვის პროცესს აკვირდებიან ცესკოს წარმომადგენლები, ასევე, სადამკვირვებლო ორგანიზაციები, რომელთა ვინაობა განსაზღვრულია ცესკოს განკარგულებით.