ზამთრის სიცივე დედამიწის უდიდეს ნაწილში უკვე ძალიან მძაფრად იგრძნობა, თუმცა არც ერთი სხვა ქალაქი ისე არ იტანჯება, როგორც ალასკის ჩრდილო-დასავლეთში მდებარე უტკიავიკი. ამ ქალაქის მაცხოვრებლებისთვის მზე ბოლოჯერ კვირას ამოვიდა და ამის შემდეგ დღის სინათლეს დიდხანს ვეღარ იხილავენ.

ქალაქში, რომელსაც წარსულში ბეროუ ერქვა, მზე მომდევნო 65 დღის განმავლობაში აღარ ამოვა. რაოდენ გასაოცარიც უნდა იყოს, ადგილობრივებს 23 იანვრამდე პოლარული ღამეების სიბნელეში მოუწევთ ცხოვრება.

უტკიავიკი არქტიკული წრიდან 530 კმ-ით არის დაშორებული, რაც ადგილობრივებს ყოფას შეუმსუბუქებს, რადგან ქალაქში უკუნითი სიბნელე ყოველთვის არ იქნება. ამის ნაცვლად, უტკიავიკში ბინდი გამოანათებს ხოლმე, როცა მზე ჰორიზონტზე ექვსი გრადუსით მიღმა იქნება. ბინდი ქალაქს მხოლოდ 6 საათის განმავლობაში "გაანათებს", დეკემბრის ბოლოდან კი მისი ხანგრძლივობა 3 საათამდე შემცირდება.

უტკიავიკის 4400 მოქალაქე პოლარულ ღამეებს მიჩვეულია, რადგან იქ ეს ჩვეულებრივი მოვლენაა. 65 ბნელი დღის გასვლის შემდეგ, ადგილობრივები ზაფხულის პოლარული დღეებისთვის მზადებას დაიწყებენ, როდესაც მზე 80 დღის განმავლობაში აღარ ჩავა.