გიორგობის დღესასწაულთან დაკავშირებით სამების საკათედრო ტაძარში მისულ პრეზიდენტობის კანდიდატებს სალომე ზურაბიშვილსა და გრიგოლ ვაშაძეს პატრიარქმა მიმართა და ღირსეული საქციელისკენ მოუწოდა. პატრიარქის თქმით, ისინი ერთმანეთს უნდა დაეხმარნონ და გამარჯვების შემთხვევაში არ უნდა იფიქრონ, რომ უკეთესები არიან.

"მე დარწმუნებული ვარ, რომ თქვენ ღირსეულად შეხვდებით, გამარჯვებასაც და დამარცხებასაც. მაგრამ მე მინდა გისურვოთ, რომ ვინც უნდა გაიმარჯვოს, მან არ უნდა იფიქროს, რომ სხვაზე უკეთესია, მე მჯერა თქვენ, ვინც გამოიარეთ ეს მძიმე პერიოდი, დაეხმარებით ერთმანეთს. წმინდა გიორგი დაგეხმარებათ თქვენ. თქვენთვის მოვამზადე წმინდა გიორგის ხატები და მინდა გადმოგცეთ", — მიმართა პატრიარქმა პრეზიდენტობის კანდიდატებს.

სამებაში გიორგობის დღესასწაულთან დაკავშირებულ წირვას პრეზიდენტობის კანდიდატები დაესწრნენ. ილია მეორემ პრეზიდენტობის ორივე კანდიდატს წმინდა გიორგის ხატი აჩუქა.