კიევში, რუსეთის საელჩოს გვერდით მოკლული რუსი ოპოზიციონერის, ბორის ნემცოვის სახელობის სკვერი გაიხსნება. რადიო თავისუფლების რუსული ბიურო ინფორმაციით, აღნიშნული გადაწყვეტილება ქალაქის საბჭომ ერთსულოვნად მიიღო.

ბორის ნემცოვი მოსკოვში, კრემლთან ცეცხლსასროლი იარაღიდან 2015 წლის 27 თებერვალს მოკლეს. მისი მკვლელობის საქმეზე ხუთი პირია გასამართლებული, თუმცა მკვლელობის დამკვეთი რუსეთის გამოძიებამ ვერ გამოავლინა.

ნემცოვის ოჯახის წევრები და თანამებრძოლეები ამბობენ, რომ მისი მკვლელობის უკან შესაძლოა ჩეჩნეთის ხელისუფლება იდგეს.

მოსკოვში ნემცოვის მკვლელობის ადგილას მემორიალია გაკეთებული, გარდა ამისა, ოპოზიციონერის სახლთან ჩამოკიდებულია მემორიალური დაფა, რასაც ოპოზიციონერის თანამებრძოლეები წლების განმავლობაში ითხოვდნენ.

მოსკოვის ხელსუფლება უარს ამბობს ნემცოვის სახელი მიანიჭოს ხიდს, სადაც ის მოკლეს. გარდა ამისა, ორივე არსებული მემორიალი ხშირად პროსახელისუფლებო აქტივისტების თავდასხმის ობიექტია.

ამერიკის შეერთებული შტატების დედაქალაქში იმ ქუჩას, სადაც რუსეთის საელჩოა განთავსებული, მოკლული რუსი ოპოზიციონერის, ბორის ნემცოვის სახელი მიმდინარე წლის იანვარში დაარქვეს. ვაშინგტონის ქალაქის საბჭოს განცხადებით, ქუჩისთვის ნემცოვის სახელის მინიჭების მიზანი დემოკრატიის მოკლული აქტივისტის ხსოვნისთვის პატივისცემაა.