მას შემდეგ, რაც გარდაცვლილი დემურ სტურუას ნათესავები სტურუას მიერ დაწერილ წერილთან დაკავშირებით დასკვნას უკვე 1 კვირაა ელოდებიან, დღეს ისინი სამტრედიის პროკურატურასთან შეიკრიბნენ.

როგორც სტურუას ნათესავები აცხადებენ, გარდაცვლილმა წერილი, რომელშიც პოლიციელის მიერ ძალადობაზე საუბრობს, თვითმკვლელობამდე დაწერა. ისინი განმარტავენ, რომ აღნიშნულ წერილთან დაკავშირებით ექსპერტიზის დასკვნა დღეს უნდა ყოფილიყო და თუ ის დროულად არ დაიდება, პროტესტის უკიდურეს ფორმას მიმართავენ.

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა:

"პოლიციელი გ. მემუქრებოდა ვინმეს პლანი ხო არ აქო დათესილიო, უნდა მითხრაო. თორემ რაც არ გაგიკეთებია, იმას შეგტენიო, მემუქრებოდა და მანქანაში გამლახა, წამიყვანა იანეთისკენ და აქ მოგკლავო. მემუქრებოდა გ. თ. - მილიციელი. მილიციასთან უნდა ითანამშრომლოო, ვის აქვს და ვის არაო პლანი დათესილიო ან კულაშშიო ან დაფნარშიო და საჯავახოშიო. ეს მოხდა 07.08.2016 აგვისტოს, კარგად გემშვიდობებით ყველას. დემური სტურუა. 20:10. დედა დარჩი მარტო, მაგრამ რა ვქნა".

აღსანიშნავია, რომ პოლიციელმა, რომელსაც სტურუა მუქარაში ადანაშაულებდა, გამოძიების დასრულებამდე, თანამდებობა დატოვა.

სტურუას თვითმკვლელობამდე მიყვანის საქმეზე გამოძიებას დასავლეთ საქართველოს საოლქო პროკურატურის საგამოძიებო ნაწილი უკვე რამდენიმე დღეა აწარმოებს. გამოძიება სისხლის სამართლის კოდექსის 333-ე (უფლებამოსილების გადამეტება) და 115-ე (თვითმკვლელობამდე მიყვანა) მუხლებით მიმდინარეობს.