მოქალაქე გოგი ხოჭოლავა, რომელიც რამდენიმე დღის წინ მოპედით ავარიაში მოყვა, შსს-ს საქმის არასათანადო გამოძიებაში ადანაშაულებს.

მისი მონაყოლიდან ირკვევა, რომ 11 ნოემბერს თბილისში, კოსტავას ქუჩაზე, ესტაკადაზე მოპედით გადაადგილებისას ტოიოტას მარკის ავტომობილმა საავარიო სიტუაცია შეუქმნა და ადგილიდან მიიმალა. ხოჭოლავა ამბობს, რომ ინციდენტის გამო მძიმე დაზიანება მიიღო.

როგორც მან On.ge-ს უთხრა, გამოძიებას არ დაუკითხავს თვითმხილველები და ამ დრომდე არ ამოუღია ბენზინგასამართი სადგურის ვიდეოკამერების ჩანაწერები.

"ვიყავი შინაგან საქმეთა სამინისტროში და გამომძიებელი დამცინავად მეუბნება, რომ ამ საქმეს ვერ გამოვიძიებთ, დაწერე, რომ წაიქეცი და დავხუროთ საქმე", — იხსენებს ხოჭოლავა.

ის ვარაუდობს, რომ მანქანის მძღოლი, რომელიც ამ ინციდენტში მონაწილეობდა, სავარაუდოდ, შსს-ს თანამშრომელია, რის გამოც საქმეს არასათანადოდ იძიებენ.

მის საქმეზე გამოძიება სისხლის სამართლის კოდექსის 276 მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს. მისივე თქმით, გენინსპექციისთვის ჯერ არ მიუმართავს და კონსულტაციებს იურისტებთან გაივლის.

შინაგან საქმეთა სამინისტროში On.ge-ს განუცხადეს, რომ გამოძიების შესაძლოა პრობლემასთან დაკავშირებით ხოჭოლავამ პროკურატურას უნდა მიმართოს ან გამოძიების დასრულებას დაელოდოს. უწყება განმარტავს, შემთხვევის ამსახველი კადრები უკვე ამოღებულია და მათი შესწავლა დაწყებულია.