დღეს, 13 ნოემბერს საქართველოში ევროკავშირის ელჩმა კარლ ჰარცელმა საქართველოში არსებული წინასაარჩევნო გარემო შეაფასა. ტელეკომპანია იმედის თარგმანის მიხედვით, ელჩმა თქვა, რომ მიუღებელია ის სიძულვილის ენა და მუქარები, რომლებიც სხვადასხვა კანდიდატების მიმართ ისმის:

"ნეგატიურად განვითარებულ წინასაარჩევნო გარემოს ვაკვირდებით, მაგრამ მინდა აღვნიშნო, რომ ეს არის არჩევანი კანდიდატებისა, რომლებიც ამ კამპანიაში მონაწილეობენ. ჩვენ იმედი გვაქვს, რომ გამოძიება, რომელიც დაწყებულია ამ მუქარებთან დაკავშირებით, წარმატებით დასრულდება და მალე გამოძიებული იქნება ყველაფერი".

ხელისუფლების მიერ მხარდაჭერილი კანდიდატი, სალომე ზურაბიშვილი ამბობს, რომ მას და მის შვილებს მოკვლით ემუქრებოდნენ. ამის შესახებ მან საგანგებო ბრიფინგზე ისაუბრა.

საპრეზიდენტო კანდიდატის, სალომე ზურაბიშვილისა და მისი ოჯახის წევრების მიმართ მუქარის საქმეზე შინაგან საქმეთა სამინისტრომ გამოძიება კომპიუტერულ სისტემაში უნებართვო შეღწევისა და მუქარის მუხლით დაიწყო. სახალხო დამცველი ნინო ლომჯარია კი შსს-ში გამოკითხვაზე დაიბარეს.

არჩევნების მეორე ტური

2018 წლის საპრეზიდენტო არჩევნებზე ცესკომ ხმების 100% დაითვალა. მონაცემების მიხედვით, ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის მეორე ტური გაიმართება.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.