დღეს საქართველოს პრემიერმინისტრმა გიორგი კვირიკაშვილმა ბორჯომის მოსახლეობას პარტია ქართული ოცნების მაჟორიტარი დეპუტატობის კანდიდატი გედევან ფოფხაძე წარუდგინა.

კვირიკაშვილის თქმით, მომავალი ოთხი წლის განმავლობაში საქართველოს ელოდება მნიშვნელოვანი ცვლილებები, ძალიან მნიშვნელოვანი გარღვევა ეკონომიკურ განვითარებაში:

"ეს ყველაფერი უპირველეს ყოვლისა ეხება ბორჯომს, სადაც ადგილობრივი ტურიზმის განვითარების განსაკუთრებული პოტენციალია".

პრემიერის განცხადებით, ქართული ოცნება ბორჯომის ევროპაში ერთ-ერთ ყველაზე მნიშვნელოვან და საინტერესო ტურისტულ მიმართულებად გადაქცევის კონკრეტული გეგმები აქვს.

"ეს არ არის ცარიელი სიტყვები, ეს რეალობაა და მას აუცილებლად აღასრულებს მმართველი გუნდი".

კვირიკაშვილმა არსებული წინასაარჩევნო გარემოც შეაფასა:

"დღეს სრულიად განსხვავებული წინასაარჩევნო გარემოა, ტელევიზიაში აღარ ისმის მთავრობის ქება-დიდება, პირიქით, ხშირად უსამართლოდაც ისმის კრიტიკა, მაგრამ ეს ნორმალურია".

წარდგენის შემდეგ ბორჯომი-ასპინძის გაერთიანებული საარჩევნო ოლქის მაჟორიტარი დეპუტატობის კანდიდატი გედევან ფოფხაძემ სიტყვით გამოვიდა.

მან 2012 წელს ქართული ოცნების გამარჯვება გაიხსენა და აღნიშნა, რომ ბორჯომი ახლაც ამ გამარჯვების ავანგარდში უნდა იყოს:

"ქართული ოცნების გამარჯვება იქნება ბორჯომის ძალიან დიდი გამარჯვება. ამიტომ, დაპირებებზე არაფერს გეუბნებით. ჩვენ ბორჯომელებმა რა გავაკეთოთ იმისათვის, რომ ქართულმა ოცნებამ გაიმარჯვოს, ამაზე ვიფიქროთ. ჩვენს წილ ბრძოლაზე ვიფიქროთ, რომელიც შესატანია ამ დღეებში, რომ 8 ოქტომბერი არანაკლებ დიდი გამარჯვება იყოს სრულიად საქართველოსი. ჩვენ, ბორჯომელებმა, ამ გამარჯვებაში ჩვენი სიტყვა უნდა ვთქვათ. ახლაც ავანგარდში უნდა ვიყოთ. ამისთვის ვართ ჩვენ აქ შეკრებილები".