საპრეზიდენტო არჩევნების მეორე ტურის თარიღი ისევ უცნობია, თუმცა, გამორიცხული არ არის, რომ იგი არა კვირა დღეს, არამედ, რომელიმე სამუშაო დღეს დაინიშნოს. ცენტრალურ საარჩევნო კომისიაში On.ge-ს განუმარტეს, რომ შედეგების შემაჯამებელი სხდომის დღიდან, ზუსტად ორი კვირის თავზე გაიმართება მეორე ტური. ხოლო, თუკი თარიღი სამუშაო დღეს დაემთხვევა, ეს საკანონმდებლო დარღვევა არ იქნება.

ცესკოში ამბობენ, რომ შემაჯამებელი სხდომის ჩანიშვნამდე რიგი საკანონმდებლო პროცედურები დარჩა, მათ შორის, უნდა გავიდეს საოლქო საარჩევნო კომისიების შემაჯამებელი ოქმების გასაჩივრების ვადები.

ტელეკომპანია რუსთავი 2-ის შეკითხვაზე, რამდენად შესაძლებელია სამუშაო დღე აარჩიოს ცესკომ, კომისიის თავმჯდომარემ თამარ ჟვანიამ დეტალებზე არ ისაუბრა და თქვა, რომ შეჯამების ვადებზეა დამოკიდებული. მისივე განცხადებით, აქამდე გაჟღერებული თარიღები, 2 დეკემბერი, 25 ნოემბერი თუ 28 ნოემბერი, ცესკოს სხდომამდე რეალური ვერ იქნება.