თბილისის სატრანსპორტო კომპანიამ 220 ახალი პატარა, რვამეტრიანი ავტობუსის შესასყიდად ტენდერი გამოაცხადა. ტენდერის ღირებულება 79 564 320 ლარია, რაც ერთ ტრანსპორტზე საშუალოდ 361 ათასი ლარია.

როგორც თბილისის მერმა კახა კალაძემ დედაქალაქის მთავრობის სხდომაზე განაცხადა, ტენდერი გასულ კვირას გამოცხადდა და 15 ნოემბერს დასრულდება.

როგორც ტენდერის დოკუმენტშია აღწერილი, პრეტენდენტის მიერ შემოთავაზებული ყველა ავტობუსი უნდა იყოს ერთი მარკისა და ერთი მოდელის. ავტობუსების გამოშვების თარიღი უნდა იყოს არანაკლებ 2018 წელი. კომპანიამ მერიას ავტობუსები ხელშეკრულების გაფორმებიდან რვა თვის ვადაში ეტაპობრივად უნდა მიაწოდოს. ავტობუსში უნდა იყოს შშმ პირებისთვის ადაპტირებული პანდუსი, არანაკლებ ექვსი USB დამტენი და Wi-Fi მოდემი.

თბილისის მერიამ 90 ავტობუსი მიმდინარე წლის აგვისტოშიც იყიდა. ამ ტენდერში მხოლოდ ერთი კომპანია შპს თეგეტა თრაქ ენდ ბას მონაწილეობდა და ის მომსახურების გაწევის სანაცვლოდ 45 მილიონ ლარს მიიღებს, რაც საშუალოდ ერთ ტრანსპორტზე 500 ათასია.

2017 წლის მარტიდან თბილისს თბილისს 143 ახალი Man-ის ფირმის, CNG ძრავზე მომუშავე და ადაპტირებული ავტობუსები ემსახურება.