საქართველოს პრეზიდენტი, გიორგი მარგველაშვილი საპრეზიდენტო არჩევნებში გადასულ რომელიმე კანდიდატს, სალომე ზურაბიშვილს ან გრიგოლ ვაშაძეს მხარს არ უჭერს. ამის შესახებ მარგველაშვილმა TV პირველის კითხვაზე პასუხის გაცემის დროს განაცხადა.

მისი თქმით, მას რომ ნდომებოდა, ამ პოლიტიკურ პროცესში ჩართვა, თავად მიიღებდა მონაწილეობას.

მოქმედმა პრეზიდენტმა მოსახლეობას მოუწოდა მონაწილეობა მიიღონ არჩევნების მეორე ტურში და არავის უნდა "დაეზაროს" თავისი პოზიციის დაფიქსირება.

ცესკომ ხმების 100% დაითვალა. მონაცემების მიხედვით, საქართველოში მეორე ტური ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის გაიმართება. ცესკომ წინასწარი მონაცემების განახლებული შედეგები რამდენიმე წუთის წინ გამოაქვეყნა.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.