ცესკოს მონაცემებით, 15 საათისთვის საპრეზიდენტო არჩევნებზე აქტივობა 30,98%-ია, რაც იმას ნიშნავს, რომ ხმა 1 085 730-მა ამომრჩეველმა მისცა.

აღსანიშნავია, რომ 2013 წლის პრეზიდენტის არჩევნებზე 15 საათის მდგომარეობით აქტივობა 32,1% იყო.

ცესკო ინფორმაციას დარღვევების შესახებაც ავრცელებს. მათი ცნობით, საერთაშორისო გამჭვირვალობა — საქართველოს განცხადება, რომ ზუგდიდში დამკვირვებელმა რამდენიმე კონვერტი ყუთში ჩაყარა, არასწორია. საარჩევნო კომისია წერს, რომ კომისიის ერთ-ერთი წევრი ამავე უბნის ამომრჩეველი იყო და მან არჩევნებში თავად მიიღო მონაწილეობა.

ცესკოს ინფორმაციით, ბოლნისის ოთხ საარჩევნო უბანზე სუბიექტის წარმომადგენლები საუბნო კომისიის მუშაობაში ერეოდნენ, გაფრთხილების შემდეგ კი ერთ უბანზე იგივე ტენდენცია გაგრძელდა. ამის გამო წარმომადგენელს საარჩევნო უბანში დაატოვებინეს.

როგორც ცესკოს განცხადებაში წერია, ახალქალაქის N46-ე უბანზე კომისიის წევრს არასაჯარო ინფორმაციის გადაღების მცდელობა ჰქონდა, რის გამოც მას თავმჯდომარემ ტელეფონი გაუტეხა.

მათივე ცნობით, დიდუბის N28-ე საარჩევნო უბანზე ბიულეტენების დაკარგვის შესახებ ინფორმაცია სიმართლეს არ შეესაბამება.