თანასწორობის მოძრაობამ მეზობლების მხრიდან მომეტებული საფრთხის გამო ოფისი შეიცვალა. ორგანიზაციის წარმომადგენელი On.ge-სთან საუბარში აღნიშნავს, რომ წინა მისამართზე, ნინოშვილის ქუჩაზე მუშაობა და ლგბტ თემის წევრების და მეგობრების, ასევე ბენეფიციარების მიღება საფრთხის გამო შეუძლებელი გახდა.

მისივე თქმით, იძულებულები გახდნენ ახალი ოფისი მოეძებნათ, სადაც შედარებით მშვიდად შეძლებდნენ მუშაობის გაგრძელებას.

8 ოქტომბერს, 23 საათზე ეგნატე ნინოშვილის ქუჩაზე, ორგანიზაციის ოფისის მიმდებარედ ლგბტ აქტივისტებს თავს დასხნენ და სცემეს. თანასწორობის მოძრაობის წარმომადგენლის თქმით, მეზობელი, რომელიც თავს დაესხა ლგბტ აქტივისტებს, აიძულებდათ ნინოშვილის ქუჩიდან გადასულიყვნენ და ამისთვის მეზობლების ხელმოწერების შეგროვებასაც კი აპირებდა.

შინაგან საქმეთა სამინისტროში ინციდენტის გამოძიება ჯერ კიდევ არ დასრულებულა. გამოძიება საქართველოს სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. შსს-ს ცნობით, მიმდინარეობს მოწმეთა გამოკითხვა და შესაბამისი ექსპერტიზების დანიშვნა.