ორგანიზაცია თანასწორობის მოძრაობა აცხადებს, რომ დღეს, 28 ოქტომბერს, 23 საათზე ეგნატე ნინოშვილის ქუჩაზე, მათი ოფისის მიმდებარედ ლგბტ აქტივისტებს თავს დასხნენ და სცემეს.

ორგანიზაციის ცნობითვე, დაზარალებულია სამი ლგბტ აქტივისტი:

"თავდამსხმელები იყვნენ მეზობლები. მათ ეზოში მოიმწყვდიეს ლგბტ თემის წევრები, რომლებიც ოფისის დატოვებას აპირებდნენ და ფიზიკურად გაუსწორდნენ. ერთ-ერთი თავდამსხმელი ლგბტ აქტივისტის დახრჩობას ცდილობდა, ასევე ემუქრებოდა, რომ მანქანიდან იარაღს ამოიღებდა და მოკლავდა".

ორგანიზაციის წარმომადგენელმა მარიამ კვარაცხელიამ On.ge-სთან საუბარში თქვა, რომ მაშინვე გამოიძახეს სასწრაფო სამედიცინო დახმარება. მისი თქმით, ორ აქტივისტს ტანსაცმელი აქვს შემოხეული და ნაცემები არიან, მესამეს კი ყელის არეში აღენიშნება დაზიანება და აქვს ემოციური შოკი.

თანასწორობის მოძრაობის თანამშრომლებმა გამოიძახეს პოლიცია, რომელიც, მათივე თქმით, ადგილზეა მისული და დეტალებს არკვევს.

საკითხის გასარკვევად On.ge დაუკავშირდა შინაგან საქმეთა სამინისტროს და მათი ინფორმაცია მიღებისთანავე აისახება მასალაში.