პრემიერ-მინისტრის, მამუკა ბახტაძის შეფასებით, მმართველი პარტიის თავმჯდომარემ, ბიძინა ივანიშვილმა რუსთავი 2-სგან მხოლოდ მინიმალური სტანდარტების დაცვა მოითხოვა.

"ძალიან კარგად ვიცი მან რა თქვა. მინიმალური სტანდარტის მოთხოვა, ისევე, მოთხოვნა იმის, რომ ნებისმიერი ტელევიზიიდან, მათ შორის, თქვენი ტელევიზიიდან [რუსთავი 2] უნდა ისმოდეს განსხვავებული აზრი, ეს არის ძალიან მნიშვნელოვანი მოქალაქეობრივი პოზიცია", — აღნიშნა პრემიერმა.

მისივე თქმით, ბიძინა ივანიშვილის სიტყვების ინტერპრეტირება, როგორც მუქარა, არასწორია. პრემიერმა კიდევ ერთხელ აღნიშნა, რომ მედიაში განსხვავებული აზრი აუცილებელია:

"რა თქმა უნდა, ეს მედიის გადასაწყვეტია ამ სტანდარტს როგორ დაიცავს. მაგრამ ის, რომ არ ისმის განსხვავებული აზრი, ის, რომ გარკვეული ადამიანები ვერ მიდიან ტელევიზიაში გარკვეული მიზეზების გამო თავიანთი აზრის დასაფიქსირებლად, ჩემი აზრით, მიუღებელია".

23 ოქტომბრის 3 ჟურნალისტთან სატელევიზიო ინტერვიუს დროს ქართული ოცნების თავმჯდომარემ, ბიძინა ივანიშვილმა რუსთავი 2-ის კრიტიკას დიდი დრო დაუთმო. უფრო კონკრეტულად, ივანიშვილმა ტელეკომპანია მინიმუმ 40-ჯერ ახსენა.

ივანიშვილმა რუსთავი 2 მატყუარად და ნაციონალური მოძრაობის იდეების გამტარებლად, ჟურნალისტები კი არაპროფესიონალებად მოიხსენია. მისი თქმით, რუსთავი 2-ის კრიტიკული სიუჟეტები მიკერძოებულად არის გაშუქებული.

ივანიშვილმა ასევე აღნიშნა, რომ თუ მოსახლეობა რუსთავი 2-ს გამორთავს ქვეყანაში აღმავლობის მეტს ვერაფერს ნახავს. მისივე თქმით, ოცნების პიარჯგუფები მცდელობას არ დააკლებენ, რომ ამ ტელევიზიაში განსხვავებული აზრი შეიტანონ.