ტელეკომპანია კავკასია ბიძინა ივანიშვილის ინტერვიუს ფორმატზე უარს ამბობს. ტელევიზიაში აცხადებენ, რომ მმართველი გუნდის თავმჯდომარის იდეა მიუღებელია და სურვილის შემთხვევაში, მას საკუთარ ფორმატს სთავაზობენ.

ტელეკომპანიის განცხადებით, თუ შეხვედრას პრესკონფერენციის ფორმატი აქვს, მაშინ მასზე დასწრება ყველა მედიას უნდა შეეძლოს და არა მხოლოდ ხუთ ტელევიზიას. ტელეკომპანიის დირექტორის განმარტებით, თუ ეს იქნება ტოქ-შოუების წამყვანების კომბინირებული გადაცემა, მაშინ ჟურნალისტები უნდა წვეყტდნენ ვისთან სურთ დაჯგუფება და არა ივანიშვილი.

"ასეთ ფორმატში იკარგება ინტერვიუს არსი, კითხვების თანმიმდევრობა, ლოგიკურობა და შესაბამისად აზრს კარგავს კითხვის დასმა. მოხარული ვიქნებით, თუ ქართული ოცნების თავმჯდომარის პიარ სამსახური უფრო მეტი პასუხისმგებლობით მოეკიდება დასახულ ამოცანებს, საკუთარ დამსაქმებელს, ქართულ მედიას და უფრო მკაფიოდ ჩამოყალიბებულ, აპრობირებულ ფორმატებს შემოგვთავაზებს თანამშრომლობისთვის, რათა აზრი არ დაეკარგოს ჟურნალისტის პროფესიულ საქმიანობას და რესპოდენტთან ურთიერთობა არ იქცეს არსს მოკლებულ გამაღიზიანებელ სანახაობად", — აცხადებენ ტელევიზიაში.

სამ ტელევიზიასთან ინტერვიუს შემდეგ ივანიშვილმა 5 ხუთი ტელეკომპანია მიიწვია. 26 ოქტომბერს, 11 საათზე ივანიშვილს მაესტროს, ობიექტივის, პალიტრა NEWS-ის, კავკასიისა და იბერიის ჟურნალისტებთან აქვს ინტერვიუ დაგეგმილი.

პრესსამსახურის განცხადებით, ამ შეხვედრაზე რუსთავი 2-ც მიწვეულია, რადგან წინა შეხვედრაზე ივანიშვილის შეფასებები და კრიტიკა მათ სარედაქციო დამოუკიდებლობაში ჩარევად აღიქვეს. რუსთავი 2-ის დირექტორის განცხადებით, შეხვედრას არ დაესწრებიან, რადგან საჭირო კითხვებზე პასუხები უკვე მიიღეს.

ჟურნალისტებთან ინტერვიუს ფორმატი ბიძინა ივანიშვილმა თავად შეარჩია და მოდერატორობასაც თავად უწევს. პირველ შეხვედრაზე ივანიშვილმა თავადვე შეარჩია ჟურნალისტებიც, თუმცა რუსთავი 2-მა და TV პირველმა სხვა ჟურნალისტები გაგზავნა.