მმართველი პარტიის თავმჯდომარის, ბიძინა ივანიშვილის პრესსამსახურის განცხადებით, მუქარის ეჭვის გასაფანტად რუსთავი 2-ს ინტერვიუზე კიდევ ერთხელ იწვევს, რომელსაც სხვა მედიებიც დაესწრებიან.

26 ოქტომბერს, 11 საათზე ივანიშვილს მაესტროს, ობიექტივის, პალიტრა NEWS-ის, კავკასიისა და იბერიის ჟურნალისტებთან აქვს ინტერვიუ დაგეგმილი. პრესსამსახურის განცხადებით, ამ შეხვედრაზე რუსთავი 2 მიწვეულია იმიტომ, რომ წინა შეხვედრაზე ივანიშვილის შეფასებები და კრიტიკა მათ სარედაქციო დამოუკიდებლობაში ჩარევად აღიქვეს.

"თავმჯდომარე რუსთავი 2-ს 26 ოქტომბერს დაგეგმილ შეხვედრაზეც იწვევს, რათა ამ ტელევიზიას მიეცეს საშუალება, ნებისიერ თემაზე დასვას კითხვები და შეასრულოს განსხვავებული აზრის საკუთარ მაყურებლამდე მიტანის ვალდებულება", — წერია განცხადებაში.

გუშინ, 24 ოქტომბერს 3 ჟურნალისტთან სატელევიზიო ინტერვიუს დროს ივანიშვილმა რუსთავი 2-ის კრიტიკას დიდი დრო დაუთმო. უფრო კონკრეტულად, ივანიშვილმა ტელეკომპანია მინიმუმ 40-ჯერ ახსენა.

გარდა ამისა, ქართული ოცნების თავმდჯომარე რუსთავი 2-ის ჟურნალისტს, ეკა კვესიტაძეს მიმართავდა რეპლიკებით "კეთილი იქონიეთ და ზრდილობას მოუხმეთ", "ელემენტარული კულტურა მოიხმარეთ და პასუხი დამაცადეთ", "ზრდილობა გამოიჩინეთ". ინტერვიუს მსვლელობის დროს, მან 91-ჯერ თქვა დამელოდეთ.

ივანიშვილმა ინტერვიუს მსვლელობისას განაცხადა, რომ თუ მაყურებელი რუსთავი 2-ს გამორთავს ქვეყანაში აღმშენებლობას დაინახავს. მისივე თქმით, პიარ ჯგუფებს ამუშავებს იმისთვის, რომ ტელეკომპანიაში განსხვავებული აზრი შეიტანოს.