მმართველი პარტიის საპრეზიდენტო კანდიდატმა, სალომე ზურაბიშვილმა განაცხადა, რომ რუსეთი, ისევე როგორც, ნაციონალური მოძრაობა მის წიგნში მოყვანილ ციტატებს კონტექსტიდან ამოგლეჯილად იყენებს.

"თუ ვინმემ იცის როგორ მუშაობს რუსეთი ამ სასამართლოებზე, მემგონი ცოტა ძალიან ზედაპირულია იმის თქმა, რომ ჩემი ერთი წიგნიდან რაღაცა ანალიზების გამოტანით წააგეთ 2011 წელს ერთი სასამართლო", — განაცხადა ზურაბიშვილმა.

ეს პასუხი სალომე ზურაბიშვილმა საპრეზიდენტო დებატების დროს ევროპული საქართველოს საპრეზიდენტო კანდიდატს, დავით ბაქრაძეს გასცა. ბაქრაძემ ზურაბიშვილს ჰკითხა გრძნობს თუ არა პასუხისმგებლობას იმის გამო, რომ რუსეთი არ აძლევს დევნილ მოსახლეობას საქართველოს ტერიტორიებზე დაბრუნების საშუალებას.

ამის მაგალითად ბაქრაძემ ჰააგის სასამართლოში რუსეთის მიერ შეტანილი საპასუხო სარჩელი მოიყვანა. მისი თქმით, ამ საბუთებით დასტურდება რომ რუსეთი საქართველოს წინააღდეგ სარჩელში ზურაბიშვილის ციტატებს იყენებს.

საქართველოს სარჩელი რუსეთის წინააღმდეგ ჰააგაში

საქართველოს ხელისუფლებამ სისხლის სამართლის საერთაშორისო სასამართლოში რუსეთის წინააღმდეგ სარჩელი 2008 წლის 12 აგვისტოს შეიტანა. ჰააგის სასამართლოს პროკურორმა 2015 წლის 13 ოქტომბერს მიმართა წინასასამართლო პალატას, რომ 2008 წლის აგვისტოს ომის ფარგლებში ჩადენილ დანაშაულებებზე გამოძიება დაეწყოთ.

რუსეთი უარს აცხადებს ითანამშრომლოს ჰააგის სისხლის სამართლის საერთაშორისო სასამართლოსთან საქართველო–რუსეთის 2008 წლის ომის დანაშაულის გამოძიების შესახებ.