ქუთაისის მერიამ მდინარე ოღასკურას კალაპოტი მოაბეტონა. ამის შესახებ ფოტო მასალა ფეისბუქში გავრცელდა.

როგორც ქუთაისის მერიაში On.ge-ს განუცხადეს, მდინარის კალაპოტში ბეტონის დასხმის მიზეზი უხვი ნალექია, რომელსაც მდინარე სწრაფად ვერ ატარებს და ქალაქი იტბორება. მერიაში ამბობენ, რომ ამასთან ერთად, მომავალში მდინარის ადიდების შედეგად მოგროვილი ქვა-ღორღი, ქვიშა თუ ხის ნარჩენები ადვილად გაიწმინდება.

მერიაში განმარტავენ, რომ მათ ეს გადაწყვეტილება სპეციალისტებთან ერთად შეიმუშავეს, რათა აღნიშნული პრობლემა ქალაქში საბოლოოდ მოგვარდეს.

"მდინარე ოღასკურა გასული საუკუნის 80-იანი წლების შემდეგ არ გაწმენდილა, რის გამოც უხვი ნალექის დროს ადიდებული მდინარე მთელ ქალაქს ტბორავდა და მოსახლეობას აზარალებდა", — განაცხადეს მერიაში.

მერია მდინარის ჩაბეტონების კიდევ ერთ მიზეზს ასახელებს და ამბობს, რომ მისი კალაპოტი 7 მეტრამდე გაფართოვდა, რაც აქამდე სილისა და ნალექის გამო 3-4 მეტრამდე იყო შემცირებული.