პანამური იურიდიული ფირმის, მოსაკ ფონსეკას მთავარ ოფისში, პანამის ორგანიზებული დანაშაულის წინააღმდეგ ბრძოლის დეპარტამენტი შევიდა.

ქვეყნის გენერალური პროკურორის თქმით, გამომძიებლები კომპანიის დოკუმენტაციას შეისწავლიან, რათა შესაძლო არალეგალური აქტივობები გამოავლინონ.

დეპარტამენტის თანამშრომლები მოსაკ ფონსეკას ოფისში 18 საათის განმავლობაში იმყოფებოდნენ.

როგორც პანამის პროკურატურაში აცხადებენ, ისინი სხვა ქვეყნის ძალოვნებთანაც თანამშრომლობენ, რათა ნებისმიერი სახის სამართალდარღვევა აღმოაჩინონ.

მსოფლიოს 400-მდე ჟურნალისტისთვის ანონიმური წყაროს მიერ ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად.