კანადაში მარიხუანის ლეგალიზაციის პირველივე დღეს გაყიდვებმა ყოველგვარ მოლოდინს გადააჭარბა. ონლაინ-მაღაზიები გადაიტვირთა, რეალური მაღაზიების წინ კი უზარმაზარი რიგები დადგა, თუმცა საზოგადოების ერთ ნაწილს ჯერაც ვერ გაუცნობიერებია, რომ მარიხუანის მოწევა და გაზრდა დანაშაული აღარაა.

ტორონტოს პოლიცია ცნობიერების ასამაღლებელ კამპანიას აწარმოებს, რომლის მთავარი კონცეფციაც იმ მიზეზების წარმოჩენაა, რომელთა გამოც 911-ში არ უნდა დარეკო. ტვიტებში ნათქვამია, რომ აუცილებელი აღარაა, პოლიციაში დარეკო, თუ ხედავ "მოზრდილ ადამიანს, რომელიც ჯოინთს ეწევა", თუ აღმოაჩენ, რომ "მეზობელი მარიხუანას ზრდის" ან თუ "ქვედა სართულიდან მოსაწევის სუნი ამოდის".

"კანაბისი 2018 წლის 17 ოქტომბრიდან არალეგალური აღარაა", - განმარტავს პოლიცია.

"ის, რომ დაიკარგეთ და მიმართულება არ იცით, 911-ში დასარეკად საკმარისი მიზეზი არაა. ისევე, როგორც მოზრდილი ადამიანის დანახვა, რომელიც ჯოინთს ეწევა. კანაფის მოხმარება დაშვებულია ყველგან, სადაც სიგარეტს ეწევიან, მანქანების გამოკლებით. ნუ დარეკავთ ამის გამო პოლიციაში"

"911-ში იმის გასარკვევად დარეკვა, თუ რა უნდა უქნათ გაყინულ ხორცს შუქის წასვლისას, არ შეიძლება. იგივე შეგვიძლია ვთქვათ შემთხვევაზეც, როცა მეზობლის ბინიდან მოსაწევის სუნი შემოდის. მოხმარება დაშვებულია 19 წელს ზემოთ ყველა ადამიანისთვის. ნუ დარეკავთ ამ მიზეზით პოლიციაში".

მარიხუანა კანადაში წლების განმავლობაში იყო აკრძალული, რამაც მთელი თაობების ცნობიერება ჩამოაყალიბა. ახლა კი ოფიციალურ პირებს არა მხოლოდ კანონის, არამედ მსოფლმხედველობის შეცვლაც უწევთ.

ოთხშაბათს კანადაში 100-ზე მეტი ლეგალური მაღაზია გაიხსნა, სადაც მარიხუანა თავისუფლად იყიდება. მარაგს 120 ლიცენზირებული "ფერმერი" ავსებს. ექსპერტების პროგნოზით, წლის ბოლომდე კიდევ ასობით მაღაზიის გახსნას უნდა ველოდოთ.

კანადა პირველი ქვეყანაა "დიდი შვიდეულიდან", რომელმაც მარიხუანის ლეგალიზებას დაუჭირა მხარი. მარიხუანის მოხმარებასთან დაკავშირებით კანონის შემსუბუქება 2015 წელს ქვეყნის ამჟამინდელი პრემიერმინისტრის, ჯასტინ ტრუდოს წინასაარჩევნო დაპირება იყო.