საქართველოში ევროკავშირის ელჩი, კარლ ჰარცელი "სუბელიანის ჩანაწერებს" ეხმაურება და ამბობს, რომ ბრალდებები, რომლებიც ისმის, სერიოზულია და მოითხოვს საფუძვლიან გამოძიებას. ჰარცელის თქმით, თუ საქმე გამოუძიებელი დარჩა, ეს პოლიტიკის მიმართ ნდობის განადგურების რისკს ქმნის.

"იმას კი არ დაიწყებენ, ვინ არის მართალი და ვინ — არა, ეს ნარევი, ზოგადად, პოლიტიკის მიმართ ადამიანების ნდობას გამოუთხრის ძირს. ეს არის პრობლემა. ამაზე უნდა დავფიქრდეთ, როგორ უნდა მოვუაროთ ამ საკითხს", — განაცხადა ევროკავშირის ელჩმა.

ევროკავშირის ელჩმა, კარლ ჰარცელმა მედიასთან გაცნობითი შეხვედრა დღეს, 18 ოქტომბერს გამართა.

"მირზა სუბელიანის ჩანაწერები"

პროკურატურისა და რუსთავი 2-ის მიერ გავრცელებული "მირზა სუბელიანის აუდიოჩანაწერები", საგამოძიებო უწყების პოზიციით სხვადასხვა დროსაა ჩაწერილი. რუსთავი 2-მა 11 ოქტომბრის, ხოლო პროკურატურამ 6 ივლისის ჩანაწერი გაასაჯაროვა. ამის მიუხედავად, აუდიოჩანაწერებში თემების ნაწილი მეორდება და ერთმანეთს უპირისპირდება კიდეც.

რუსთავი 2-ის ჩანაწერით, სუბელიანს კომპრომატები აქვს ხელისუფლების მაღალჩინოსნების წინააღმდეგ, ხოლო პროკურატურის მიერ გავრცელებული აუდიოჩანაწერით, მირზა სუბელიანი აპირებს მოიტყუოს. აუდიოჩანაწერის ავთენტურობა ჯერჯერობით დადასტურებული არ არის.

რუსთავი 2-მა დღეს, 18 ოქტომბერს ახალი ფარული აუდიოჩანაწერი დააანონსა.