ქართული ოცნების დეპუტატი ეკა ბესელია ფიქრობს, რომ "მირზა სუბელიანის ფარული აუდიო ჩანაწერების გავრცელებით" მედიამ კანონი დაარღვია, რომელსაც სისხლის სამართლის კოდექსის 158 მუხლი არეგულირებს.

ეკა ბესელიას თქმით, ამ მუხლით დასჯადია არა მხოლოდ ინფორმაციის უკანონოდ მოპოვება, არამედ მისი გავრცელებაც.

"უნდა დასრულდეს იმ კანონის გადაბიჯება, რომელიც გულისხმობს ასეთი ჩანაწერების გაშვების აკრძალვას, როცა ის არ არის კანონიერად მოპოვებული, ეს ეხება მედიასაც. ჩანაწერის გასაჯაროვების ერთადერთი ლეგიტიმაცია საგამოძიებო ორგანოს აქვს", — განაცხადა ეკა ბესელიამ ტელეკომპანია პირველის ეთერში.

კითხვაზე, რატომ აქვს მსგავსი პოზიცია პოლიტიკურ გუნდს, რომელიც ფარული კადრების გასაჯაროვების შემდეგ მოვიდა ხელისუფლებაში, ეკა ბესელია პასუხობს, რომ სწორედ ამ ფაქტებმა განაპირობა კანონის გამკაცრება 2014 წელს.

"2014 წლის მაისში გავამკაცრეთ სპეციფიკური მუხლი სისხლის სამართლის კოდექსში. ეს არის კერძო კომუნიკაციის წესის დარღვევა და პირადი საიდუმლოს ხელყოფა. 2012 წელს კადრებით არ გამიგია, რა ხდებოდა ამ ქვეყანაში, ადამიანებმა საკუთარ თავზე გადაიტანეს ეს ყველაფერი და ეს კადრები იმ ადამიანებისთვის იყო ახალი, ვინც ეს არ გადაიტანა. როცა საზოგადოებამ აღმოაჩინა, რომ არაფერი პრივატული არ არსებობს და ყველაფერი კონტროლდება, ეს იყო შოკი და შევთანხმდით, რომ ეს მუხლი გაგვემკაცრებინა", — განაცხადა ეკა ბესელიამ.

სისხლის სამართლის კოდექსის 158-ე მუხლი კერძო კომუნიკაციებს არეგულირებს.

ამ კანონის პირველი მუხლის მიხედვით, კერძო საუბრის უნებართვო ჩაწერა ან მიყურადება, აგრეთვე კომპიუტერულ სისტემაში ან სისტემიდან კერძო კომუნიკაციისას გადაცემული კომპიუტერული მონაცემის ან ამგვარი მონაცემის მატარებელი ელექტრომაგნიტური ტალღების უნებართვო მოპოვება ტექნიკური საშუალების გამოყენებით ან კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის ან კომპიუტერული მონაცემის უკანონოდ შენახვა ისჯება ჯარიმით ან თავისუფლების აღკვეთით ვადით ორიდან ოთხ წლამდე.

კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის ან კომპიუტერული მონაცემის უკანონოდ გამოყენება, გავრცელება ან ხელმისაწვდომობის სხვაგვარი უზრუნველყოფა, ისჯება ჯარიმით ან თავისუფლების აღკვეთით ვადით ორიდან ხუთ წლამდე.

"მირზა სუბელიანის ჩანაწერები"

პროკურატურისა და რუსთავი 2-ის მიერ გავრცელებული "მირზა სუბელიანის აუდიოჩანაწერები", საგამოძიებო უწყების პოზიციით სხვადასხვა დროსაა ჩაწერილი. რუსთავი 2-მა 11 ოქტომბრის, ხოლო პროკურატურამ 6 ივლისის ჩანაწერი გაასაჯაროვა. ამის მიუხედავად, აუდიოჩანაწერებში თემების ნაწილი მეორდება და ერთმანეთს უპირისპირდება კიდეც.

რუსთავი 2-ის ჩანაწერით, სუბელიანს კომპრომატები აქვს ხელისუფლების მაღალჩინოსნების წინააღმდეგ, ხოლო პროკურატურის მიერ გავრცელებული აუდიოჩანაწერით, მირზა სუბელიანი აპირებს მოიტყუოს. აუდიოჩანაწერის ავთენტურობა ჯერჯერობით დადასტურებული არ არის.

პროკურატურაში ამბობენ, რომ ფარულ აუდიოჩანაწერებზე გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.

აუდიოჩანაწერების მოსმენის შემდეგ მმართველი პარტია დადგმულ სერიალზე საუბრობდა, ოპოზიცია კი სისტემურ დანაშაულზე. სასჯელაღსრულების სამსახურში დაადასტურეს, რომ 15 ოქტომბერს მირზა სუბელიანმა თვითმკვლელობა სცადა.