დეველოპერული კომპანია ანაგის 11-მა თანამშრომელმა ქართული ოცნების მიერ მხარდაჭერილ საპრეზიდენტო კანდიდატს, სალომე ზურაბიშვილს 179 000 ლარი გადაურიცხა.

როგორც კომპანიის საიტზე წერია ანაგის დამფუძნებელი არის ზაზა გოგოტიშვილი, ხოლო მისი გენერალური დირექტორი — ირაკლი გოგოლიშვილი.

ანაგის თანამშრომლები, რომლებმაც ზურაბიშვილს თანხა გადაურიცხეს.

  • გიორგი ჩიხლაძე, ტექნიკური დეპარტამენტის უფროსი — 6 000 ლარი;
  • გიორგი ჩიტაშვილი, ჯგუფის ფინანსური დირექტორი — 5 000 ლარი;
  • ლევან იორაშვილი, სამშენებლო უბნის უფროსი — 7 000 ლარი;
  • დავით შალიკაძე, სამშენებლო უბნის უფროსი — 35 000 ლარი;
  • ზაზა ცისკარიძე, სამშენებლო უბნის უფროსი — 15 000 ლარი;
  • გიორგი მარტინენკო, უფროსი სამუშაოთა მწარმოებელი — 25 000 ლარი;
  • ზვიად მუკუტაძე, უფროსი სამუშაოთა მწარმოებელი — 50 000 ლარი;
  • მიხეილ ჯანელიძე, უფროსი სამუშაოთა მწარმოებელი — 10 000 ლარი;
  • მერაბ ფრანგიშვილი, სამუშაოთა მწარმოებელი — 4 000 ლარი;
  • დავით მუკბანიანი, სამუშაოთა მწარმოებელი — 10 000 ლარი;
  • თეიმურაზ მეგრელაძე, პროექტების უფროსი მენეჯერი — 12 000 ლარი.

გადარიცხვებთან დაკავშირებით On.ge კომპანიას დაუკავშირდა, თუმცა, როგორც ანაგში აღნიშნეს დირექტორთან დაკავშირება ოფისის ტელეფონზეა შესაძლებელი.

ანაგის სამშენებლო პროექტებს შორისაა გალერია თბილისი, ისთ ფოინტი, თბილისი გარდენსი, თბილისის საკრებულოს შენობის რეაბილიტაცია, მესტიის აეროპორტი, სითი მოლი.

ეს პირველი შემთხვევა არ არის, როდესაც სამშენებლო კომპანიის თანამშრომლები სალომე ზურაბიშვილის მსხვილი შემწირველები არიან. ამ დრომდე პრეზიდენტობის ამ კანდიდატს არქის სხვადასხვა პროექტის მეწილეებმა ჯამში 300 000 ლარი გადაურიცხეს. თენგიზ წულაია პარლამენტში ქართული ოცნების დეპუტატის, ივლიანე წულაიას ბიზნესპარტნიორია.