ცენტრალურმა საარჩენო კომისიამ დარღვევად არ მიიჩნია ის ფაქტი, რომ ჩხოროწყუს მუნიციპალიტეტის სოფელ კირცხში საბავშვო ბაღის გახსნაზე ტორტზე პარტია ქართული ოცნების ლოგო იყო გამოსახული.

დარღვევაზე ცენტრალურ საარჩევნო კომისიაში განცხადება ორგანიზაცია სამართლიანმა არჩევნებმა (ISFED) შეიტანა. განცხადების თანახმად ტორტზე პარტიის ლოგოს გამოსახულებით დაირღვა საარჩევნო კოდექსის 45-ე მუხლის მე-7 პუნქტის მოთხოვნები, რომლის მიხედვით, აკრძალულია სახელმწიფო ან ადგილობრივი თვითმმართველობის ბიუჯეტის დაფინანსებით ორგანიზებულ ღონისძიებაზე აგიტაციის გაწევა.

ჩხოროწყუს საოლქო საარჩენო კომისიის 3 ოქტომბრის გადაწყვეტილებით, ვინაიდან პოლიტიკურ გაერთიანება ქართულ ოცნებას საპრეზიდენტო არჩევნებზე არ ჰყავს საკუთარი კანდიდატი, საბავშვო ბაღში მომხდარი ფაქტი არ შეიცავდა აგიტაციიის ნიშნებს:

"ბაღის გახსნაზე წარდგენილი არ ყოფილა საქართველოს პრეზიდენტობის არცერთი კანდიდატი, შესაბამისად, ქართული ოცნების ლოგოს ქვეშ განხორციელებული რაიმე ქმედება, ვერ მიიჩნევა წინასაარჩევნო აგიტაციად".

კირცხში საბავშვო ბაღის ახალი შენობა 17 სექტემბერს საზეიმოდ გაიხსნა. გახსნის ცერემონიას კი სამეგრელო-ზემო სვანეთის გუბერნატორი ალექსანდრე მოწერელია და ჩხოროწყუს მერი დათო გოგუა ესწრებოდნენ.