საქართველოს საპატრიარქო პარლამენტიდან კანაფის კულტივაციის კანონპროექტის გაწვევას ითხოვს. პატრიარქის მოსაყდრის, მეუფე შიოს განცხადებით, საპატრიარქოს აქვს მოლოდინი, რომ პარლამენტი კანონპროექტს არ განიხილავს.

მოსაყდრე შიოს თანაშემწე, მამა ანდრია ჯაღმაიძე კი აცხადებს, რომ საპატრიარქო ერთმნიშვნელოვნად უარყოფით დამოკიდებულებას ინარჩუნებს კანონის მიმართ. მისი თქმით, წინასწარ არ იციან რას მოიმოქმედებენ თუ პარლამენტი კანონს არ გაიწვევს, მაგრამ მათი დამოკიდებულება რადიკალურია.

დღეს, 10 ოქტომბერს შინაგან საქმეთა მინისტრმა კანონპროექტის განხილვის გადავადების მიზეზად კონსულტაციები დაასახელა და განაცხადა, რომ კანონპროექტზე მუშაობა იქამდე გაგრძელდება, სანამ მხარეების პოზიციები არ დაახლოვდება. მისივე განმარტებით, საზოგადოების არცერთ ნაწილთან დაპირისპირებას არ აპირებენ.

გახარიამ აღნიშნა, რომ დისკუსიები გაგრძელდება, მათ შორის "მწვავე ფორმითაც", რადგან ორივე მხარეს არის ძლიერი არგუმენტები. უმრავლესობის წევრები კი განაცხადეს, რომ დედა ეკლესიის აზრს გაითვალისწინებენ.

ეკლესია კანონპროექტის წინააღმდეგ

შინაგან საქმეთა სამინისტროს მიერ შემუშავებული კანონპროექტი "მცენარე კანაფის კონტროლის" შესახებ სამედიცინო მიზნით მარიხუანის დათესვას, მოყვანა და კულტივაციას გულისხმობს. კანონპროექტის მიხედვით, მარიხუანის მხოლოდ ექსპორტი იქნება დაშვებული, ხოლო იმპორტი აკრძალული. ასევე, აიკრძალება არასამედიცინო მიზნით კანაფის კულტივაციაც.

დოკუმენტი 131-გვერდიანია და დამტკიცების შემდეგ ათამდე კანონში შევა ცვლილება. კანონპროექტს როგორც ეკლესიიდან, ისე საზოგადოებისგან კრიტიკა მოჰყვა. საქართველოს საპატრიარქომ განცხადება გაავრცელა, სადაც აღნიშნა, რომ სრულიად მართლმადიდებელი ეკლესია და მრევლი ეწინააღმდეგება ნებისმიერი მიზნისთვის მარიხუანის რეალიზაციის ლეგალიზებას.

საქართველოს მართლმადიდებელი ეკლესიის დაპირისპირების შემდეგ უმრავლესობამ კანონპროექტის გადავადების გადაწყვეტილება მიიღო. პარლამენტში კანონპროექტის უკან გაწვევაზეც მსჯელობდნენ.