2019 წლის სახელმწიფო ბიუჯეტის პროექტის მიხედვით, საჯარო უწყებებში საშტატო თანამშრომლების რაოდენობა 1 500-ით მცირდება, ხოლო სახელფასო ფონდი 60 მილიონი ლარით იზრდება.

ფინანსთა მინისტრის მოადგილემ, გიორგი კაკაურიძემ საკომიტეტო მოსმენაზე განმარტა, რომ სახელფასო ფონდის ზრდა დაკავშირებულია ძალოვან უწყებებში დაბალი რანგის, ძირითადად, პოლიციელების ანაზღაურების მატებასთან. მისივე განმარტებით, ეს არ არის დაკავშირებული მთლიანად საჯარო სექტორში ხელფასების მატებასთან.

რაც შეეხება საშტატო თანამშრომლების შემცირებას, კაკაურიძემ აღნიშნა, რომ ეს არის არსებული ვაკანტური თანამდებობების შემცირება.

"მოგეხსენებათ, გასულ წელს შრომის კანონის ამოქმედების შემდეგ და რამდენიმე სამინისტროს შერწყმის შედეგად გარკვეული შტატების გამოთავისუფლება მოხდა. ეს არის არსებული ვაკანტური თანამდებობების ამოღება საშტატოდან, რათა შემდგომში აღარ მოხდეს ზრდა. მომდევნო წელს მნიშვნელოვანი შემცირებები დაგეგმილი არ არის", - განაცხადა კაკაურიძემ.

დღეს, 9 ოქტომბერს ბიუჯეტის პროექტს ადამიანის უფლებათა დაცვისა და თავდაცვისა და უშიშროების კომიტეტში განიხილავენ.

საქართველოს მთავრობამ სახელმწიფო ბიუჯეტის პროექტი შეიმუშავა და საქართველოს პარლამენტს განსახილველად უკვე წარუდგინა. საპარლამენტო კომიტეტებში სახელმწიფო ბიუჯეტის პროექტს დარგების მიხედვით განიხილავენ. პარლამენტის რეგლამენტის მიხედვით, ბიუჯეტის პროექტი რამდენჯერმე გადამუშავდება, საბოლოოდ კი, პარლამენტი დოკუმენტს დეკემბრის ბოლომდე დაამტკიცებს. 2018 წელთან შედარებით 2019 წელს საქართველოს ბიუჯეტი 12 729 700 000 ლარით განისაზღვრა, რაც 270 200 000 ლარით აღემატება 2018 წლის ანალოგიურ მაჩვენებელს.