გაერთიანებული ოპოზიცის საპრეზიდენტო კანდიდატი, გრიგოლ ვაშაძე აცხადებს, რომ საქართველოში მართლმადიდებელ ეკლესიაზე შეტევა გრძელდება. მისი თქმით, "ყველა უბედურებასთან" ერთად ქვეყანა ადგას ნარკოპლანტაციად ქცევის გზას. ამის შესახებ მან ლანჩხუთში ამომრჩეველთან შეხვედრისას ისაუბრა.

ვაშაძემ კიდევ ერთხელ აღნიშნა, რომ მარიხუანის კულტივაცია და ექსპორტი ქვეყანას დააზარალებს და კოლუმბიის შემდეგ საქართველოს მომავალი ავღანეთს შეადარა.

"ეს არის ჩვენი გენეტიკური ფონდის, ახალგაზრდა თაობის განადგურება. ეს არის საქართველოს მომავალზე უზარმაზარი ხაზის გადასმა. ეს არის ის, რომ ჩაფლული ყურებამდე კორუფციაში, ნარკოდანაშაულში. ჩვენ დავუშვებთ საქართველოს ავღანიზაციას?" — განაცხადა კანდიდატმა.

მას შემდეგ, რაც ცნობილი გახდა, რომ შინაგან საქმეთა სამინისტრო მარიხუანის კულტივაციის კანონპროექტზე მუშაობდა ვაშაძემ ეს ინიციატივა გააკრიტიკა. მიხეილ სააკაშვილისა და მეუფე იაკობის განცხადებების შემდეგ, ვაშაძემ აღნიშნა რომ მარიხუანის კულტივაციამ ეკონომიკურად განვითარებული კოლუმბია გაანადგურა და საქართველოსთვისაც საფრთხისშემცველია.

რაც შეეხება მარიხუანის მოხმარების ლეგალიზაციას, ვაშაძემ მოხმარება პედოფილიას შეადარა. მოგვიანებით კი აღნიშნა, რომ განცხადება ემოციურ ფონზე გააკეთა და დაამატა, რომ კანონპროექტი ახალგაზრდობის გასანადგურებლად და ამომრჩევლის გასათიშად არის მოგონილი.