არასრულწლოვანს პირს, რომელიც 2018 წლის 17 მაისს გეი აქტივისტ ნიქო გორგილაძეს თავს დაესხა, პროკურატურამ ბრალი წაუყენა. აღკვეთის ღონისძიების სახით მას შეეფარდა მშობლის მეთვალყურეობაში გადაცემა. ინფორმაცია On.ge-ს პროკურატურიდან მიაწოდეს.

უწყებაში ამბობენ, რომ აღშნინულ ფაქტზე გამოძიება თავდაპირველად სისხლის სამართლის კოდექსის 126-ე, ძალადობის მუხლით დაიწყო. თუმცა, მოგვიანებით საქმე გადაკვალიფიცირდა და არასრულწლოვანს ბრალი სსკ-ს 156-ე მუხლის მეორე ნაწილის "ა" ქვეპუნქტით წარედგინა, რაც გულისხმობს ადამიანის დევნას, ჩადენილს ძალადობით ან ძალადობის მუქარით. ჩადენილი დანაშაული ისჯება ჯარიმით ან შინაპატიმრობით ვადით ერთიდან ორ წლამდე ანდა თავისუფლების აღკვეთით ვადით სამ წლამდე

17 მაისს ჰომოფობიასა და ტრანსფობიასთან ბრძოლის საერთაშორისო დღეს აქტივისტები მთავრობის ადმინისტრაციასთან იყვნენ შეკრებილი. ნიქო გორგილაძის სიტყვით გამოსვლის დროს 15 წლის პირმა პოლიციის კორდონი გაარღვია აქტივისტს თავს დაესხა და სცემა. პოლიციამ ის ადგილზევე დააკავა.

24 მაისს გორგილაძის საქმეზე შინაგან საქმეთა სამინისტროს ადამიანის უფლებათა დაცვის დეპარტამენტში სოციალური ქსელით განხორციელებული მუქარის შესახებ განცხადება შევიდა. რის შემდეგაც საქმეზე გამოძიება სისხლის სამართლის კოდექსის 151-ე მუხლით დაიწყო. ამ მუხლით, პირის სისხლის სამართლის პასუხისმგებლობა მუქარისთვის დგება.

მოგვიანებით, გორგილაძემ მომხდართან დაკავშირებით განცხადება გაავრცელა და აღნიშნა, რომ დამნაშავეა სისტემა და მას აგრესია არ აქვს თავდამსხმელის მიმართ.

ამავე თემაზე: