მმართველი პარტია ქართული ოცნება საქართველოს ტერიტორიების დაკარგვაში ნაციონალურ მოძრაობას ადანაშაულებს. პარტიის გენერალური მდივანის, კახა კალაძის განცხადებით, ნაციონალურმა მოძრაობამ ოკუპირებული რეგიონები რუსეთს თავად ჩააბარა. ამის შესახებ კალაძემ პარტიის საგანგებო შეკრების შემდეგ ისაუბრა.

"როგორც საყოველთაოდ ცნობილია, ამ რეჟიმის ყველაზე მძიმე დანაშაულები იყო ძალადობა, კორუფცია, მედიის თავისუფლების ტოტალური შეზღუდვა, რუსეთისთვის ჩვენი ისტორიული რეგიონის ჩაბარება", — განაცხადა კალაძემ.

თბილისის მერმა ასევე ისაუბრა მმართველი პარტიის მხარდაჭერილი კანდიდატის, სალომე ზურაბიშვილის კრიტიკაზეც. მისი თქმით, ნაციონალური მოძრაობა ღალატს აბრალებს და აკრიტიკებს იმ ადამიანს, ვინც რუსეთის ჯარები გაიყვანა საქართველოდან, როცა ეს ჯარები თავად შემოიყვანეს ქვეყანაში.

"ამ პოლიტიკურმა ძალამ თავისი ავანტურისტული თუ მოღალატეობრივი ქმედებებით მისცა რუსეთს შესაძლებლობა, აესრულებინა დიდი ხნის წადილი და განეხორციელებინა აფხაზეთისა და ცხინვალის სრული ოკუპაცია", — აღნიშნა კალაძემ.

სალომე ზურაბიშვილის აქტიური კრიტიკა მას შემდეგ დაიწყო, რაც მმართველი პარტიის მიერ მხარდაჭერილმა საპრეზიდენტო კანდიდატმა განაცხადა, რომ 2008 წლის აგვისტოს ომში საომარი მოქმედებები საქართველომ დაიწყო.

სალომე ზურაბიშვილი აგვისტოს ომზე

ზურაბიშვილმა ტოქ-შოუ რეაქციაში 2008 წლის ომზე საუბრისას განაცხადა, რომ ქართულმა მხარემ თავისი მოსახლეობა დაბომბა, რაც ფაქტებითაა დასაბუთებული.

"ჩვენ დავბომბეთ ჩვენი მოსახლეობა, რისი უფლებაც არც ერთ პრეზიდენტს არ გააჩნია. ჩვენ მეორე დღეს როგორ უნდა ვთქვათ, რომ ამ ქვეყნის მთლიანობა გვინდა? მე მინდა მთლიანობა ამ ქვეყნის და არ მინდა, რომ პრეზიდენტმა დაბომბოს თავისი ტერიტორია და ქალაქები", - განაცხადა სალომე ზურაბიშვილმა.

ჟურნალისტის კითხვაზე რა გავლებას მოახდენს მისი განცხადებები საქართველოს საერთაშორისო იმიჯზე, სალომე ზურაბიშვილმა უპასუხა:

"მე ხომ არ ვამბობ, რომ რუსეთმა არ დაგვბომბა? პირობას გაძლევთ, რომ ჩემს წინააღმდეგ და საქართველოს წინააღმდეგ ამას ვერავინ გამოიყენებს, რადგან დიპლომატია კარგად ვიცი და ვიცი, საერთაშორისო დონეზე როგორ უნდა მოვიქცე".

კითხვა, თუ ვინ დაიწყო ომი, საქართველომ თუ რუსეთმა, სალომე ზურაბიშვილს პირველად მაშინ დაუსვეს, როცა მან საპრეზიდენტო არჩევნებში საკუთარი კანდიდატურა წარადგინა.

"ომი დაიწყო საუკუნის წინ რუსეთმა, ჩვენ იმ დროს ჩავერთეთ რუსეთის პროვოკაციაში და წავედით ამ საომარ ვითარებაში, საქართველომ დაიწყო ეს ნაწილი ამ საომარი ვითარების. ეს არის ყველასთვის ცნობილი და ოფიციალური ვერსია, რასაც ევროკავშირი ადასტურებდა, ჩვენ ამას არ გადავხედავთ", - თქვა ზურაბიშვილმა.

ჟურნალისტებმა იგივე კითხვა რამდენჯერმე ისევ გაუმეორეს, თუმცა ზურაბიშვილმა პასუხი არ გასცა.

2016 წელს კი ზურაბიშვილმა განაცხადა, რომ რუსეთისთვის ოკუპანტის სტატუსის მინიჭება საქართველოს ყველამხრივ ბლოკავს.

"ეს ჩვენი შეზღუდვაა, რადგან ქვეყანა, რომელსაც არ შეუძლია, არ აპირებს სამხედრო გზით [მოქმედებას], ვერ ვიტყვით უარს დიპლომატიურ გზაზე. რომ ეს დიპლომატიურ გზა არ არის დათმობის გზა, რომ აქ უნდა იყოს ჯებირები. რომ ამ გზაზე არ შეიძლება დადიოდნენ ოპოზიციონერები. ეს დიპლომატიური გზა შიგნით კარგად უნდა იყოს შეთანხმებული, ყველა პარტიის კონსესუსი უნდა იყოს".