ჭიათურის მერმა, პაატა ნადირაძემ თანამდებობა დატოვა. ამის შესახებ მას ფეისბუქზე დაწერა. გადადგომის მიზეზად ნადირაძე კი საკრებულოს დეპუტატებთან, ჭიათურის მაჟორიტარ დეპუტატთან და პოლიციის უფროსთან დაპირისპირებას ასახელებს.

"რამოდენიმე თვის განმავლობაში მიდიოდა მსჯელობა, ბჭობა ჩვენს გუნდში თანამდებობებიდან წასვლაზე. გარე დაპირისპირებების გამო გუნდი ხვდებოდა, რომ ამ ფონზე საქმის კეთება გაგვიჭირდებოდა. ხან მე მაჩერებდნენ, ხან მე ვაჩერებდი მათ. ვცდილობდი, ვპირდებოდი რომ დალაგდებოდა ურთიერთობები, თუმცა უშედეგოდ. დღითიდღე იძაბებოდა განწყობები ჩვენი გუნდის მიმართ, რასაც ბევრი ზემდგომი სტრუქტურებიც ხელს უწყობდა, მე არაერთხელ ვეცადე დამერეგულირებინა, საკრებულოს ბომონდთან, მაჟორიტარ დეპუტატთან, პოლიციის უფროსთან, სხვადასხვა ძალისმიერ სტრუქტურებთან ურთიერთობები მაგრამ ამაოდ", — წერს ნადირაძე.

პაატა ნადირაძე ჭიათურის მერად 2017 წელს აირჩიეს. მანამდე, 2015-2017 წლებში მუშაობდა იმერეთში გუბერნატორის პირველი მოადგილის თანამდებობაზე.

ჭიათურის მუნიციპალიტეტში სხვადასხვა დარღვევაზე აუდიტის სამსახურმა ანგარიში აგვისტოში გამოაქვეყნა. დაკარგული, გამოუყენებელი და გაფუჭებული სამშენებლო მასალები, წყლის სისტემის დაუსრულებელი რეაბილიტაცია და შეუსრულებელი ინფრასტრუქტურული პროექტები — ეს დარღვევები აღმოაჩინა აუდიტის სამსახურმა.

სახელმწიფო აუდიტის სამსახურმა ჩაატარა ჭიათურის მუნიციპალიტეტის 2016-2017 წლების ბიუჯეტით გათვალისწინებული პროგრამების შესაბამისობის აუდიტი.

ანგარიშში აღნიშნულია, რომ ინფრასტრუქტურული პროექტების განსახორციელებლად მუნიციპალიტეტს გამოუყენებელი და დასაწყობებული აქვს 744 100 ლარის მასალები. მიუხედავად იმისა, რომ მუნიციპალიტეტმა ინფრასტრუქტურული პროექტების შესასრულებლად ჯამში გადაიხადა 1 534 000 ლარი, სამუშაოები დაუსრულებელია.

გარდა ამისა, მუნიციპალიტეტს შესყიდული და გამოუყენებელი აქვს 66 400 ლარის საპროექტო-სახარჯთაღრიცხვო მომსახურება, რომლითაც დაგეგმილი ინფრასტრუქტურული პროექტები არ განხორციელებულა.