ცნობილია იმ ადგილების სია, სადაც 6-7 ოქტომბერს, თბილისობის დღესასწაულზე გარევაჭრობა ნებადართული იქნება. ამის შესახებ თბილისის მერიის მთავრობის სხდომაზე კახა კალაძემ ისაუბრა.

ეს ადგილებია:

  • ჩუღურეთის რაიონი, ხეთაგუროვის სკვერიდან ბარათაშვილის მიმდებარე ტერიტორია;
  • სამგორის რაიონი, ვიქტორ კუპრავას #10, ე.წ. სვანების ბაზრობის ტერიტორია;
  • გლდანი, ხიზანიშვილის ქუჩა, გლდანის პარკსა და პოლიციის შენობას შორის არსებული ტერიტორია;
  • დიდუბე, სტანისლავსკის ქუჩა, დიდუბე პლაზას მიმდებარე ტერიტორია;
  • დიღმის მასივი, პაიჭაძის ქუჩა #1, სკვერის მიმდებარე ტერიტორია;
  • საბურთალო, სპორტის სასახლის მიმდებარე ტერიტორია;
  • ვაკე, გეგეშიძის ბაღი.

თბილისის მერის, კახა კალაძის თქმით, აღნიშნულ ადგილებზე ნებისმიერ ადამიანს შეეძლება საკუთარი პროდუქციის განთავსება და გაყიდვა.

თბილისობა 2018-ის ორგანიზებისთვის თბილისის მერია 905 421 ლარის დახარჯვას გეგმავს. მუნიციპალიტეტი მომსახურებას ტენდერის გარეშე, პირდაპირი შესყიდვის წესით შეიძენს.

დაგეგმილი ღონისძიებები

6 ოქტომბერი

მერიის ინფორმაციით, თბილისობის პირველ დღეს, 6 ოქტომბერს ახალი ქართული მიუზიკლი — "თბილისური ვოდევილი" გაიმართება. მიუზიკლში მონაწილეობას ქართული ესტრადის წარმომადგენლები, მსახიობები და მოცეკვავეები მიიღებენ. მიუზიკლი ევროპის მოედანზე, თემატურად დეკორირებულ სცენაზე ჩატარდება.

ამავე დღეს რიყის პარკი ყვავილების ფესტივალს — "შემოდგომის დღესასწაული" უმასპინძლებს, რომელიც ყვავილებით და შემოდგომის ნობათით გაფორმდება.

7 ოქტომბერი

თბილისის მერიის ინფორმაციით, ამ დღეს პირველი რესპუბლიკის მოედანზე, თბილისის საპატიო მოქალაქეების დაჯილდოება და გრანდიოზული გალა-კონცერტი გაიმართება. კონცერტში მონაწილეობას ევგენი მიქელაძის სახელობის ეროვნული მუსიკალური ორკესტრი ნიკოლოზ მემანიშვილის დირიჟორობით, სოლო შემსრულებლები, მუსიკალური ანსამბლები და გუნდი მიიღებს, რეჟისორი დავით დოიაშვილი იქნება.

კონცერტის ფეიერვერკით დასრულება იგეგმება.