დემოკრატიული მოძრაობის ლიდერი ნინო ბურჯანაძე, ჟურნალისტებთან ინტერვიუში, დავით უსუფაშვილს პასუხობს საქართველოს უბლოკო სტატუსის ინიციატივასთან დაკავშირებით.

ნინო ბურჯანაძე მხარდამჭერებთან ერთად ხელმოწერების შეგროვებას აპირებს, რომ საქართველოს კონსტიტუციაში უბლოკო სტატუსის ჩანაწერი შევიდეს. ამის შესახებ პარლამენტის თავმჯდომარემ დავით უსუფაშვილმა დღეს, სპეციალურად გამართულ ბრიფინგზე განაცხადა.

როგორც უსუფაშვილის განმარტავს, ინიციატორები აპირებენ შეაგროვონ ხელმოწერები და საქართველოს კონსტიტუციაში მოითხოვონ უბლოკო სტატუსის ჩაწერა, ანუ კონსტიტუციურად აუკრძალონ საქართველოს ევროპული და ევროატლანტიკური ინტეგრაცია

ნინო ბურჯანაძე ამბობს, რომ საქართველოს მოსახლეობამ უნდა გადაწყვიტოს, თუ რას დაუჭიროს მხარი ქვეყანამ:

"უბლოკო სტატუსი არის ჩვენი ქვეყნის გამთლიანების ერთადერთი რეალური შესაძლებლობა. სპეკულაცია არის ის, რასაც ამდენი ხანი ქართული პოლიტიკური სპექტრის წარმომადგენლები აკეთებდნენ, მათ შორის რესპუბლიკური პარტიის წარმომადგენლებიც. სპეკულაცია არის ნატო-ში გაწევრიანების შესახებ მოსახლეობის შეცდომაში შეყვანა, ის რომ დღეს საქართველოს პოლიტიკური სპექტრის დიდ ნაწილს უფრო მნიშვნელოვან პრიორიტეტად მიაჩნია საქართველოს ნატო-ში გაწევრიანება, ვიდრე ქვეყნის გამთლიანება".

უსუფაშვილის ინფორმაციით, საქართველოს პარლამენტში ორშაბათს 15:00 საათზე გაიმართება პარლამენტის ბიუროს სხდომა, სადაც სხვა საკითხებთან ერთად განიხილება პარლამენტში შემოსული განაცხადი საქართველოს მოქალაქეების მხრიდან. ინიციატივის ავტორები არიან ნინო ბურჯანაძე და სხვები.