საქართველოს მართლმადიდებელი ეკლესიის პატრიარქმა, ილია მეორემ საკვირაო ქადაგებისას მარიხუანის მოხმარების ლეგალიზაციასა და კანაფის ლიცენზიით კულტივაციის საფრთხეებზე ისაუბრა. პატრიარქმა აღნიშნა, რომ ნარკომანია ავადმყოფობაა და ძნელი ასატანია ოჯახში ადამიანი, რომელიც ხმარობს ნარკოტიკებს.

"მაგრამ ნარკოტიკები, ნარკომანია იკურნება. იკურნება და ეს იმედია არ უნდა დავკარგოთ. ავადმყოფმა არ უნდა დაკარგოს იმედი, რომ განიკურნება. ჩემი აზრით ჩვენ ყველაფერი უნდა გავაკეთოთ იმისათვის, რომ გვერდში ამოვუდგეთ ვაჩვენოთ სიყვარული ამ დაჩაგრულ ახალგაზრდებს და ვთხოვოთ უფალს, რომ უფალმა განკურნოს ეს სენი", - განაცხადა პატრიარქმა.

გარდა ამისა, პატრიარქმა მოუწოდა ხელისუფლებას, ეკლესიას და საზოგადოებას გაერთიანებისკენ. მისი თქმით, აუცილებელია ერთად ბრძოლა ნარკომანიის წინააღმდეგ, ახალგაზრდების გადასარჩენად.

პატრიარქმა განაცხადა, რომ საზოგადოებას ამ მღელვარების გამო არ უნდა ეგონოს თითქოს ხელისუფლებას გული არ შესტკივა ქვეყანაზე. მან მოუწოდა მთავრობას ყურადღებით მოეკიდონ და გააკონტროლონ მარიხუანის მოხმარებისა და კულტივაციის საკითხი. მისი თქმით, ეს ბიზნესი არ უნდა დარგი კერძო სექტორში, რადგან ვერ მოხდება კონტროლი.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.

გუშინ, სასულიერო პირების ნაწილმა, თბილისის საკრებულოსთან პარაკლისი აღავლინა და შინაგან საქმეთა სამინისტროს მიერ კანაფის კონტროლის შესახებ კანონპროექტი კიდევ ერთხელ გააკრიტიკა. პარაკლისს წინ უძღოდა შეხვედრა საპატრიარქოში, რომელიც გავრცელებული ინფორმაციით, კანაფის კონტროლის საკითხს უკავშირდებოდა.

მეუფე იაკობი ხელისუფლებას დაემუქრა და განაცხადა, რომ ქვეყნის ღალატს არავინ აპატიებს. მეუფე ანტონიმ კი ტოკ-შოუ რეაქციაში "სანთლების რევოლუცია" დააანონსა.