შინაგან საქმეთა მინისტრის მოადგილემ, ნათია მეზვრიშვილმა განაცხადა, რომ უწყება ნარკოდანაშაულთან მკაცრ ბრძოლას აგრძელებს ნარკოტიკების რეალიზების ნაწილში და ლიბერალური მიდგომების დანერგვა მხოლოდ მომხმარებლებისადმი არაპროპორციული სასჯელის პრაქტიკის შეცვლას ითვალისწინებს.

"ბოლო დღეებში იყო მსჯელობა, რომ შინაგან საქმეთა სამინისტრო არათანმიმდევრულია, თითქოს ერთი მხრივ სამინისტრო კლუბებში ატარებს საგამოძიებო მოქმედებებს, ხოლო მეორე მხრივ მხარს უჭერს დათესვა/მოყვანას - ჩვენ გვიყურებს ათასობით პოლიციელი, რომელმაც იცის რომ შინაგან საქმეთა სამინისტროს პოლიტიკა არ შეცვლილა ნარკოტიკული დანაშაულის წინააღმდეგ", - განაცხადა მეზვრიშვილმა.

მისი თქმით, ეს კანონპროექტი ადასტურებს უწყების თანამიმდევრულობას. მისივე თქმით, ბოლო ერთ წელში მარიხუანის მოხმარებისა და მცირე ოდენობის კულტივაციისთის, ან შეძენა-შენახვისთვის არავინ დაუკავებიათ. თუმცა, 100-მდე პირი დააკავეს რეალიზების ბრალდებით.

"ჩვენ ვებრძვით ნარკოდანაშაულს და ასეთი პოლიტიკა გრძელდება", - განაცხადა მეზვრიშვილმა.

შინაგან საქმეთა სამინისტრომ მარიხუანის მოხმარებისა და სამედიცინო მიზნით ექსპორტზე გასატანად კანაფის კულტივაციის რეგულირებისთვის ახალი კანონპროექტი შექმნა. შინაგან საქმეთა მინისტრის, გიორგი გახარიას განცხადებით, სამედიცინო მიზნით კანაფის კულტივაცია არ შექმნის დამატებით რისკებს მოხმარების წახალისებისთვის.

უწყებამ მარიხუანის მოხმარების შესახებ საკანონმდებლო ცვლილებებზე მუშაობა იმის შემდეგ დაიწყო, რაც 30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა და მარიხუანის მოხმარებისთვის ადმინისტრაციული სასჯელი გაუქმდა.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგენ ხელისუფლებას და განაცხადეს, რომ მზად არიან აჩვენონ საკუთარი ძალა.

მეუფე იაკობი ხელისუფლებას დაემუქრა და განაცხადა, რომ ქვეყნის ღალატს არავინ აპატიებს. მეუფე ანტონიმ კი ტოკ-შოუ რეაქციაში "სანთლების რევოლუცია" დააანონსა.

გუშინ, 15 სექტემბერს სასულიერო პირებმა თავისუფლების მოედანზე აქცია გამართეს და კანონპროექტი გააპროტესტეს. დღეს, 16 სექტემბერს კი სამების ტაძარში იკრიბებიან, სადაც პატრიარქი იქადაგებს.

გაიგეთ მეტი: